‘మా’లో మళ్లీ ముదురుతున్న వివాదాలు.. అసలేం జరిగిందంటే..!

ఇటీవల మూవీ ఆర్టిస్ట్ అసోసియేషన్(మా) అధ్యక్ష ఎన్నికలు ముగిసిన సంగతి తెలిసిందే. ఎన్నో వివాదాలు.. ఎన్నో గొడవల నడుమ విజయవంతంగా ఎన్నికలు పూర్తయి.. అధ్యక్ష పీఠంపై మంచు విష్ణు కూర్చున్నాడు. అతడి అధ్యక్షుడుగా ఎన్నికవ్వడం ఇష్టం లేని చాలామంది సినీ నటులు, నటీమణులు ఎన్నికలో గెలిచినా రాజీనామాలు సమర్పించారు.

ప్రకాష్ రాజ్ ప్యానల్ కు సంబంధించి సభ్యులు అందరూ దాదాపు రాజీనామాలు సపర్పించారు. అప్పట్లో ప్రకాష్ రాజ్ ఎన్నికలు జరిగిన రోజుకు సంబంధించి సీసీటీవీ ఫుటేజ్ కావాలని డిమాండ్ చేసిన విషయం తెలిసిందే. తర్వాత అతడు దాని గురించి మాట్లాడలేదు. తర్వాత చాలా రోజులకు మళ్లీ.. ‘మా’ లో వివాదాలు తెరలేస్తున్నాయి. ఎందుకంటే.. మా ఆఫీస్ కొన్ని రోజుల నుంచి మూతపడి ఉంది. కొత్త కార్యవర్గం అమల్లోకి వచ్చినా ఇంత వరకు ఆఫీస్ తాళాలుమాత్రం తీయలేదని కొంతమంది ఆరోపిస్తున్నారు.

సినీ పరిశ్రమకు సంబంధించి నటులు సమస్యల పరిష్కారం కోసం ఆఫీస్ కు వెళ్తే.. అక్కడ మూసి వేసిన తలుపులు తప్ప ఏం కనిపించడం లేదని.. కార్యవర్గ సభ్యులు ఎవరూ ఆఫీస్ కు రావడం లేదని ఆవేదన వ్యక్తం చేస్తున్నట్లు తెలిపారు. అయితే మా ఆఫీస్ కు అందరూ రావాల్సిన అవసరం ఉండదు.. కేవలం మీటింగ్ సమయలోనే అందరూ హాజరవుతారు.

మీటింగ్ లేని సందర్భంలో ఆ అవసరం ఉండదు. పరిమిత సంఖ్యలో ఉన్న సిబ్బందితో మాత్రమే కార్యాలయం పనిచేయాలి.. కానీ ప్రస్తుతం అక్కడ ఆ వాతావరణం కూడా కనిపించడం లేదంటూ ఆరోపణ చేస్తున్నారు. అయితే ఇలా ఆరోపణలు వస్తున్న నేపథ్యంలో దీనిపై మంచు విష్ణు నుంచి సమాధానం రాలేదు. అతడు ఈ ఆరోపణలపై ఎలా స్పందిస్తాడో చూడాలి.