విజయ్ దేవరకొండతో మాస్ స్టెప్పులు.. ‘రౌడీ జనార్ధన’లో క్రేజీ బ్యూటీ ఎంట్రీ!

టాలీవుడ్ స్టార్ హీరో విజయ్ దేవరకొండ నటిస్తున్న తాజా చిత్రం ‘రౌడీ జనార్ధన’పై ఇప్పటికే భారీ అంచనాలు నెలకొన్నాయి. దర్శకుడు రవి కిరణ్ కోలా తెరకెక్కిస్తున్న ఈ మాస్ యాక్షన్ ఎంటర్‌టైనర్‌కి సంబంధించిన ప్రతి అప్‌డేట్ సోషల్ మీడియాలో వైరల్ అవుతోంది. తాజాగా ఈ సినిమాకు సంబంధించిన మరో ఆసక్తికరమైన వార్త ఇండస్ట్రీ వర్గాల్లో చక్కర్లు కొడుతోంది. ఈ చిత్రంలో ఓ స్పెషల్ సాంగ్ కోసం యంగ్ హీరోయిన్ ప్రీతి ముకుందన్‌ను సంప్రదించినట్లు టాక్ వినిపిస్తోంది.

సినిమాలో వచ్చే ఈ ప్రత్యేక గీతం పూర్తిగా మాస్ ఆడియన్స్‌ను దృష్టిలో పెట్టుకుని డిజైన్ చేసినట్లు సమాచారం. విజయ్ దేవరకొండ ఎనర్జీకి తగ్గట్టుగా ఈ పాటను తెరకెక్కించనున్నారని, థియేటర్లలో ప్రేక్షకులను ఉర్రూతలూగించేలా స్టెప్పులు ఉండబోతున్నాయని సినీ వర్గాలు చెబుతున్నాయి. ఈ పాటలో విజయ్‌తో కలిసి ప్రీతి ముకుందన్ కనిపించే అవకాశాలు ఎక్కువగా ఉన్నాయని ప్రచారం జరుగుతోంది.

ఇటీవల ‘కన్నప్ప’ సినిమాతో గుర్తింపు తెచ్చుకున్న ప్రీతి ముకుందన్‌కు ప్రస్తుతం వరుస అవకాశాలు వస్తున్నాయి. ఆమె స్క్రీన్ ప్రెజెన్స్, డ్యాన్స్ స్టైల్ ఈ పాటకు బాగా సరిపోతుందని మేకర్స్ భావించినట్లు తెలుస్తోంది. అంతేకాదు, స్పెషల్ సాంగ్‌తో పాటు సినిమాలో చిన్న కానీ కీలకమైన పాత్రలో కూడా ఆమె కనిపించొచ్చని ఫిల్మ్ నగర్‌లో చర్చ నడుస్తోంది. అయితే దీనిపై చిత్రబృందం నుంచి అధికారిక ప్రకటన రావాల్సి ఉంది.

గ్రామీణ నేపథ్యంలో సాగే ఈ సినిమా పీరియాడిక్ యాక్షన్ డ్రామాగా రూపొందుతోంది. ముఖ్యంగా ఫ్లాష్‌బ్యాక్ ఎపిసోడ్స్ మూవీకి ప్రధాన ఆకర్షణగా నిలుస్తాయని సమాచారం. ఈ భాగాల్లో విజయ్ దేవరకొండ గతంలో కనిపించని రఫ్ అండ్ రగ్గడ్ లుక్‌లో కనిపించనున్నాడట. యాక్షన్ సన్నివేశాలు కూడా భారీ స్థాయిలో ప్లాన్ చేస్తున్నట్లు తెలుస్తోంది.

ఈ చిత్రంలో కీర్తి సురేష్ కథానాయికగా నటిస్తుండగా, సీనియర్ హీరో రాజశేఖర్ కీలక పాత్ర పోషిస్తున్నారు. ఆయన పాత్రలో నెగటివ్ షేడ్స్ ఉండనున్నాయని ఇండస్ట్రీలో జోరుగా ప్రచారం సాగుతోంది. భారీ బడ్జెట్‌తో తెరకెక్కుతున్న ఈ సినిమాను దిల్ రాజు, శిరీష్ నిర్మిస్తున్నారు.

ఇప్పటికే విడుదలైన టైటిల్ గ్లింప్స్‌కు ప్రేక్షకుల నుంచి మంచి స్పందన వచ్చింది. మాస్ యాక్షన్, ఎమోషన్, పవర్‌ఫుల్ క్యారెక్టర్స్ కలగలిసిన ఈ సినిమాతో విజయ్ దేవరకొండ మరోసారి బాక్సాఫీస్ వద్ద భారీ హిట్ కొట్టాలని లక్ష్యంగా పెట్టుకున్నాడు. ప్రస్తుతం ఈ మూవీకి సంబంధించిన ప్రతి చిన్న అప్‌డేట్ అభిమానుల్లో ఆసక్తిని పెంచుతోంది.