Bigg Breaking: సికింద్రాబాద్ క్లబ్ లో భారీ అగ్నిప్రమాదం..! రంగంలోకి దిగిన అగ్నిమాపక సిబ్బంది..!

Bigg Breaking: కొన్ని గంటల క్రితం తెల్లవారుజామున సికింద్రాబాద్ క్లబ్‌లో భారీ అగ్నిప్రమాదం చోటు చేసుకుంది. ఈ విషాద ఘటనలో మంటలు విపరీతంగా చెలరేగడంతో వారసత్వ కట్టడం ధ్వంసమైంది. ఆ క్లబ్ యొక్క ప్రధాన ముఖభాగం మంటల్లో కాలిపోయింది.షార్ట్ సర్క్యూట్ కారణంగా అగ్ని ప్రమాదం జరిగిందని సమాచారం.

ప్రాథమిక విచారణలో దాదాపు రూ.20 కోట్ల మేర ఆస్తి నష్టం జరిగినట్లు పోలీసులు అంచనా వేస్తున్నారు. వివరాల్లోకి వెళ్తే.. సికింద్రాబాద్‌ క్లబ్‌లో ఆదివారం (16 జనవరి, 2022) తెల్లవారుజామున 3 గంటల ప్రాంతంలో మంటలు చెలరేగాయి.

సమాచారం అందుకున్న వెంటనే అగ్నిమాపక సిబ్బంది ఘటనాస్థలికి చేరుకున్నారు. మంటలను ఆర్పేందుకు 10 ఫైర్ ఇంజన్లు రంగంలోకి దిగాయి. మంటలు భారీగా ఎగిసిపడగా, అగ్నిమాపక యంత్రాలు మంటలను అదుపులోకి తెచ్చేందుకు 3 గంటల సమయం పట్టిందని ప్రత్యక్ష సాక్షులు తెలిపారు.

దాదాపు 300 మంది సిబ్బంది పనిచేస్తున్నారని..

సికింద్రాబాద్ క్లబ్ 1879లో బ్రిటిష్ పాలనలో సైనిక అధికారుల కోసం ప్రత్యేకంగా ఏర్పాటు చేయబడింది. ఎలైట్ క్లబ్ 30 ఎకరాల విశాలమైన క్యాంపస్‌లో విస్తరించి ఉంది. ఇక్కడ 5000 మంది సభ్యులకు సభ్యత్వం ఉంది. సికింద్రాబాద్ క్లబ్‌లో దాదాపు 300 మంది సిబ్బంది పనిచేస్తున్నారని అక్కడి అధికారులు చెప్పారు. కరోనా మహమ్మారి కారణంగా సికింద్రాబాద్ క్లబ్ చాలా రోజులుగా క్లోజ్ చేసి ఉంది. కరోనా ప్యాండమిక్ కారణంగా చాలా రోజులుగా క్లోజ్ ఉన్న క్లబ్ లో ఎవరు లేకపోవడంతో ప్రాణ నష్టం జరుగలేదు. కేసు నమోదు చేసుకున్న మారేడ్ పల్లి పోలీసులు అగ్నిప్రమాదానికి గల కారణాలను దర్యాప్తు చేస్తున్నారు. దీనికి సంబంధించి పూర్తి వివరాలు తెలియాల్సి ఉంది. ప్రస్తుతం మంటలు అదుపులోకి వచ్చినట్లు సమాచారం. అక్కడ ప్రాంతంలో రాకపోకలు అంతరాయం ఏర్పడింది.