4 రోజులుగా కనిపించలేదు.. తలుపులు పగలగొట్టగా షాకింగ్ సీన్

బెంగళూరులో జరిగిన ఓ దారుణ ఘటన స్థానికంగా తీవ్ర కలకలం రేపింది. బెంగళూరులోని ఆడుగోడి ప్రాంతంలో అద్దె ఇంట్లో నివసిస్తున్న మహిళ మృతదేహం అనుమానాస్పద పరిస్థితుల్లో బయటపడింది.

పోలీసులు తెలిపిన వివరాల ప్రకారం, జార్ఖండ్‌కు చెందిన పూజా దత్తా అనే 34 ఏళ్ల మహిళ గత కొంతకాలంగా అక్కడ నివసిస్తూ ఓ ప్రైవేట్ సంస్థలో పనిచేస్తోంది. అయితే నాలుగు రోజులుగా ఆమె కనిపించకపోవడంతో పాటు, ఇంటి నుంచి దుర్వాసన రావడం ఇరుగుపొరుగు వారిని అప్రమత్తం చేసింది. దీంతో వారు వెంటనే పోలీసులకు సమాచారం ఇచ్చారు.

సంఘటనా స్థలానికి చేరుకున్న పోలీసులు తలుపులు బలవంతంగా తెరిచి లోపలికి వెళ్లగా, అక్కడ కనిపించిన దృశ్యం భయానకంగా ఉంది. మహిళ మృతదేహం తీవ్రంగా కుళ్ళిన స్థితిలో, అనుమానాస్పద పరిస్థితుల్లో కనిపించింది. గదిలో వస్తువులు చెల్లాచెదురుగా ఉండటంతో పాటు కొన్ని పత్రాలు కూడా చింపివేయబడినట్లు గుర్తించారు.

ఈ ఘటనపై ప్రాథమికంగా ఇది సహజ మరణం కాదనే అనుమానాలు వ్యక్తమవుతున్నాయి. ముఖ్యంగా ఇంటి యజమాని చెప్పిన వివరాలు దర్యాప్తుకు కీలకంగా మారాయి. పూజాను కలవడానికి తరచూ ఓ యువకుడు వచ్చేవాడని, వారి మధ్య వివాదాలు జరిగేవని సమాచారం వెలుగులోకి వచ్చింది. చివరిసారిగా ఆమెను ఏప్రిల్ 23న చూసినట్లు తెలిసింది.

ఈ నేపథ్యంలో ఇది పథకం ప్రకారం జరిగిన హత్య అయి ఉండొచ్చని పోలీసులు అనుమానిస్తున్నారు. కేసు నమోదు చేసి అన్ని కోణాల్లో విచారణ కొనసాగిస్తున్నారు. మృతదేహాన్ని పోస్ట్‌మార్టం కోసం తరలించగా, నివేదిక ఆధారంగా మరిన్ని వివరాలు వెల్లడయ్యే అవకాశం ఉంది