నెలకు రూ.5 లక్షల ఖర్చు.. నిధి అగర్వాల్ షాకింగ్ రివీల్!

టాలీవుడ్‌లో గ్లామరస్ ఇమేజ్‌తో మంచి గుర్తింపు తెచ్చుకున్న నటి నిధి అగర్వాల్ మరోసారి వార్తల్లో నిలిచారు. వరుస సినిమాలతో ప్రేక్షకులను అలరించిన ఈ బ్యూటీ, సక్సెస్‌లు ఆశించిన స్థాయిలో రాకపోయినా తన క్రేజ్ మాత్రం ఎక్కడా తగ్గలేదు. ఇటీవల ఇచ్చిన ఓ ఇంటర్వ్యూలో ఆమె చేసిన వ్యాఖ్యలు ఇప్పుడు సోషల్ మీడియాలో వైరల్ అవుతున్నాయి.

తన వ్యక్తిగత జీవితం, కెరీర్ గురించి మాట్లాడిన నిధి, ముఖ్యంగా తన నెలవారీ ఖర్చులపై ఓపెన్‌గా స్పందించారు. “నెలకు సుమారు రూ.5 లక్షలు ఖర్చవుతాయి” అని చెప్పడం అభిమానులను ఆశ్చర్యానికి గురి చేసింది. ట్రావెలింగ్, హోటల్ స్టే, డైట్, జిమ్, ట్రైనర్, బ్యూటీ కేర్ వంటి అవసరాలకే ఈ మొత్తం ఖర్చవుతుందని ఆమె వివరించారు.

అంతేకాకుండా, మేకప్, హెయిర్ స్టైలింగ్, ఫోటోషూట్ వంటి ఖర్చులు కొన్ని సందర్భాల్లో ఈవెంట్ ఆర్గనైజర్లు భరించినా, చాలా సార్లు తానే చూసుకోవాల్సి వస్తుందని చెప్పారు. సినిమా ఇండస్ట్రీలో ఇమేజ్ మెయింటైన్ చేయడం కోసం ఈ ఖర్చులు తప్పనిసరిగా మారాయని నిధి పేర్కొన్నారు.

కెరీర్ విషయానికి వస్తే, సవ్యసాచితో ఎంట్రీ ఇచ్చిన నిధి, ఇస్మార్ట్ శంకర్తో మంచి గుర్తింపు సంపాదించారు. ఆ తర్వాత పాన్ ఇండియా ప్రాజెక్టుల్లో కూడా నటించినప్పటికీ, ఆశించిన స్థాయిలో విజయాలు దక్కలేదు. అయినప్పటికీ, తన గ్లామర్, స్క్రీన్ ప్రెజెన్స్‌తో ప్రేక్షకుల్లో ప్రత్యేక స్థానం సంపాదించుకుంది.

ఇటీవల ఆమె నటించిన కొన్ని పెద్ద సినిమాలు బాక్సాఫీస్ వద్ద నిరాశపరిచినా, సోషల్ మీడియాలో మాత్రం ఆమెకు భారీ ఫాలోయింగ్ కొనసాగుతోంది. తన స్టైల్, ఫిట్‌నెస్‌పై ప్రత్యేక శ్రద్ధ పెట్టే నిధి, అదే కారణంగా ఖర్చులు ఎక్కువ అవుతున్నాయని స్పష్టం చేశారు.

ఇదిలా ఉంటే, నిధి చేసిన ఈ కామెంట్స్ ప్రస్తుతం నెట్టింట చర్చనీయాంశంగా మారాయి. సినీ తారల జీవనశైలి, వారి ఖర్చులపై ఆసక్తి ఉన్న అభిమానులు ఈ విషయంపై పెద్దఎత్తున స్పందిస్తున్నారు.