తెలంగాణలో ప్రభుత్వ ఆసుపత్రులలో ఓపీ సేవలు నిలిపివేత.. వైద్యుల ఆందోళనతో రోగులకు ఇబ్బందులు

తెలంగాణ రాష్ట్రవ్యాప్తంగా ప్రభుత్వ ఆసుపత్రుల్లో శుక్రవారం నుంచి ఔట్ పేషెంట్ (ఓపీ) సేవలు నిలిచిపోనున్నాయి. రాష్ట్ర ప్రభుత్వ వైద్యుల సంఘం (టీజీజీడీఏ) పిలుపు మేరకు వైద్యులు ఆందోళనకు దిగడంతో ఈ నిర్ణయం తీసుకున్నారు. బదిలీలకు సంబంధించిన ప్రభుత్వ నిబంధనలను సరిగా అమలు చేయడం లేదని ఆరోపిస్తూ వైద్యులు నిరసన వ్యక్తం చేస్తున్నారు.

ఈ ఆందోళనలో రాష్ట్రంలోని వేలాది మంది ప్రభుత్వ వైద్యులు పాల్గొననున్నట్లు సంఘం తెలిపింది. హైదరాబాద్‌లోని ఉస్మానియా, గాంధీ, నిలోఫర్ వంటి ప్రధాన ఆసుపత్రులతో పాటు అన్ని జిల్లాల ప్రభుత్వ వైద్యశాలల్లో ఓపీ సేవలు ప్రభావితమయ్యే అవకాశం ఉంది. అయితే అత్యవసర వైద్య సేవలు, ఇన్‌పేషెంట్ చికిత్స మాత్రం యథావిధిగా కొనసాగుతాయని వైద్యుల సంఘం స్పష్టం చేసింది.

ప్రధానంగా జీఓ 38 నిబంధనలను పూర్తిగా అమలు చేయాలని వైద్యులు డిమాండ్ చేస్తున్నారు. బదిలీల ప్రక్రియలో పారదర్శకత లేకుండా నిర్ణయాలు తీసుకుంటున్నారని ఆరోపిస్తూ ఈ ఉద్యమానికి పిలుపునిచ్చారు. సమస్య పరిష్కారమయ్యే వరకు ఆందోళన కొనసాగుతుందని సంఘ నాయకులు తెలిపారు.

ఇక ప్రభుత్వం ఇటీవల జారీ చేసిన జీఓ 38 ఉద్యోగుల బదిలీలకు సంబంధించిన మార్గదర్శకాలను నిర్దేశిస్తుంది. సీనియారిటీ, అవసరాల ఆధారంగా బదిలీలు జరగాలని, అలాగే పారదర్శక విధానాన్ని అమలు చేయాలని ఈ ఉత్తర్వుల ఉద్దేశం. స్పౌస్ క్రైటీరియా, ఫోకల్–నాన్ ఫోకల్ పోస్టింగ్ సమతుల్యత వంటి అంశాలు ఇందులో ఉన్నాయి.

వైద్యుల ఆందోళన నేపథ్యంలో ప్రభుత్వ ఆసుపత్రులకు వచ్చే రోగులు అప్రమత్తంగా ఉండాలని అధికారులు సూచించారు. అత్యవసర సేవలకు మాత్రం ఎలాంటి అంతరాయం ఉండదని స్పష్టం చేశారు.