పెళ్లికి 100 మంది అతిథులు.. జైలుకు వరుడు.. కారణం తెలిస్తే?

ప్రస్తుతం కరోనా వేగంగా వ్యాపిస్తున్న నేపథ్యంలో కరోనా ను కట్టడి చేయడానికి అధికారులు అన్ని పటిష్టమైన చర్యలు తీసుకుంటున్నారు. ఈ క్రమంలోనే ఎటువంటి శుభకార్యాలకు అయినా, పెళ్లిళ్ల కైనా కేవలం 50 మందికి మాత్రమే అనుమతిస్తున్నారు. ఇటువంటి సమయంలోనే పంజాబ్ కు చెందిన ఓ యువకుడిని పెళ్లి అయిన మరుక్షణమే పోలీసులు అరెస్టు చేసి జైలుకు పంపారు.

పెళ్లి మరుక్షణం పోలీసులు వారిని అరెస్టు చేయడంతో ప్రస్తుతం ఈ విషయం చర్చనీయాంశమైంది. జలంధర్‌లోని ఓ ఆలయంలో పెళ్లి జరిగిన వెంటనే రిసెప్షన్ ఏర్పాటు చేశారు. అయితే ఈ కార్యక్రమానికి వందమందికి పైగా అతిథులు రావడమే కాకుండా వారెవరు కరోనా నిబంధనలను, జాగ్రత్తలను పాటించకుండా వ్యవహరించడంతో ఈ విషయాన్ని గుర్తుతెలియని వ్యక్తులు పోలీసులకు ఫిర్యాదు చేశారు.

సమాచారం అందుకున్న పోలీసులు ఆలయానికి చేరుకుని వరుడిని, అతని తండ్రిని అరెస్టు చేశారు. ఉన్నఫలంగా పోలీసులు అక్కడికి రావడంతో బంధువులందరూ అక్కడి నుంచి తల ఓవైపు వెళ్ళి పోయారు. ఈ క్రమంలోనే వరుడు తన పెళ్ళికి కేవలం కొంతమందిని మాత్రమే ఆహ్వానించానని, పెళ్లికి వచ్చిన వారు తమ బంధువులు స్నేహితులను తాము పిలవలేదని, పెళ్లికి వచ్చిన వారిని వెళ్ళిపొమ్మని చెప్పడం బాగుండదు అన్న ఉద్దేశంతోనే సైలెంట్ గా ఉన్నామని వరుడు వివరించాడు.

కరోనా నిబంధనలను పాటించని నేరానికి వారిపై పోలీసులు కేసు నమోదు చేసినట్లు తెలిపారు. రోజురోజుకు కేసుల సంఖ్య పెరగటంతో ఇప్పటికే నైట్ కర్ఫ్యూ విధించడమే కాకుండా సినిమా థియేటర్లు, పార్కులు కోచింగ్ సెంటర్లు వంటివి పూర్తిగా మూసి వేసినట్లు జలంధర్ డిప్యూటీ కమిషనర్ ఈ సందర్భంగా తెలియజేశారు.