రియాన్ పరాగ్ వీడియో వైరల్.. బీసీసీఐ యాక్షన్ ఖాయమా?

ఐపీఎల్ 2026 సీజన్‌లో అద్భుత ప్రదర్శనతో దూసుకుపోతున్న రాజస్థాన్ రాయల్స్ జట్టుకు ఊహించని వివాదం తలెత్తింది. జట్టు కెప్టెన్ రియాన్ పరాగ్ డ్రెస్సింగ్ రూమ్‌లో ఈ-సిగరెట్ ఉపయోగిస్తున్నట్లు టీవీ కెమెరాల్లో కనిపించడం ప్రస్తుతం పెద్ద చర్చకు దారితీసింది. ఈ వీడియోలు సోషల్ మీడియాలో వైరల్ కావడంతో అభిమానుల్లో ఆగ్రహం వ్యక్తమవుతోంది.

చండీగఢ్ సమీపంలోని ముల్లన్‌పూర్ స్టేడియంలో పంజాబ్ కింగ్స్‌తో జరిగిన మ్యాచ్ అనంతరం ఈ ఘటన చోటుచేసుకున్నట్లు సమాచారం. మ్యాచ్ గెలిచిన ఆనందంలో జట్టు ఆటగాళ్లు రిలాక్స్ అవుతుండగా, కెప్టెన్ పరాగ్ ఒక మూలలో కూర్చుని వైపింగ్ చేస్తూ కనిపించారు. భారత్‌లో 2019 నుంచే ఈ-సిగరెట్లపై పూర్తి నిషేధం అమల్లో ఉండటంతో ఈ వ్యవహారం మరింత సీరియస్‌గా మారింది.

నిబంధనల ప్రకారం స్టేడియం లోపల నిషేధిత వస్తువులు తీసుకురావడం అనుమతించరు. అలాంటి పరిస్థితిలో డ్రెస్సింగ్ రూమ్‌లో ఈ-సిగరెట్ కనిపించడం అనేక సందేహాలకు తావిస్తోంది. ముఖ్యంగా జట్టు కెప్టెన్ స్థాయిలో ఉన్న ఆటగాడు ఇలాంటి చర్యకు పాల్పడటం క్రమశిక్షణపై ప్రశ్నలు లేవనెత్తుతోంది. ఈ విషయంపై బీసీసీఐ స్పందించే అవకాశముంది.

క్రీడాకారులు యువతకు ఆదర్శంగా ఉండాల్సిన సమయంలో ఇలాంటి ఘటనలు తప్పు సందేశాన్ని పంపుతాయని క్రీడా నిపుణులు అభిప్రాయపడుతున్నారు. ఐపీఎల్ వంటి పెద్ద వేదికలో జరిగే ప్రతి చర్య ప్రజల దృష్టిలో పడుతుందన్న విషయం గుర్తుంచుకోవాల్సిన అవసరం ఉందని వారు సూచిస్తున్నారు. నిబంధనల ప్రకారం పరాగ్‌పై జరిమానా లేదా మ్యాచ్ నిషేధం వంటి చర్యలు తీసుకునే అవకాశం ఉందని విశ్లేషకులు చెబుతున్నారు.

ఈ వివాదం పక్కన పెడితే మ్యాచ్ మాత్రం ఉత్కంఠభరితంగా సాగింది. ముందుగా బ్యాటింగ్ చేసిన పంజాబ్ భారీ స్కోర్ నమోదు చేయగా, రాజస్థాన్ జట్టు దాన్ని ధైర్యంగా ఛేజ్ చేసి విజయం సాధించింది. యువ ఆటగాళ్లు మెరుపు ఇన్నింగ్స్ ఆడడంతో లక్ష్యాన్ని సులభంగా చేరుకున్నారు.

క్రికెట్ చరిత్రలో ఇలాంటి సంఘటనలు కొత్తవి కావు. గతంలో కూడా పలువురు స్టార్ ఆటగాళ్లు ధూమపానం చేస్తూ కెమెరాలకు చిక్కిన సందర్భాలు ఉన్నాయి. అయితే ప్రస్తుత కాలంలో ఫిట్‌నెస్, క్రమశిక్షణపై ఎక్కువగా దృష్టి పెట్టే సమయంలో ఈ ఘటన ప్రాధాన్యం సంతరించుకుంది. రాబోయే రోజుల్లో బీసీసీఐ లేదా జట్టు యాజమాన్యం ఈ అంశంపై ఎలాంటి నిర్ణయం తీసుకుంటుందన్నది ఆసక్తికరంగా మారింది.