వాడు నా మేనల్లుడు కాదు. వాడి మాటలు నమ్మి ఎవరూ మోసపోకండి ! వాడిని వదిలిపెట్టను.. – సింగర్ సునీత

సినిమా లోకమంటేనే ఓ రంగుల ప్రపంచం. ఊహకందని భూతల స్వర్గం. ఊహ నిజమైతే అదృష్టం.. ఊహలకూ.. వాస్తవానికి సంబంధం లేకుండా మోసపోతే జీవితం నరకమే. సినిమా రంగంలో తమకున్న ప్రతిభతో ఒక వెలుగు వెలుగుదామని ప్రయత్నించే కొందరి బలహీనతలను ఆసరాగా తీసుకుని వాళ్ళకు సినిమా ఛాన్సులు ఇప్పిస్తామని చెప్పి మోసాలకు పాల్పడే నమ్మకద్రోహుల గురించి కొత్తగా చెప్పనవసరం లేదు. అయితే తాజాగా సింగర్ సునీత మేనల్లుడినని చెప్పి చైతన్య అనే వ్యక్తి సరిగ్గా ఇలాంటి మోసాలే చేస్తుండటంతో.. ఈ సంగతి తెలుసుకున్న సింగర్ సునీత వెంటనే తనకు చైతన్య అనే మేనల్లుడు లేడని, దయచేసి ఎవరూ అతని వలలో పడి మోసపోవద్దంటూ తన ఫేస్‌బుక్ ఖాతా ద్వారా క్లారిటీ ఇచ్చారు.

ఈ సందర్భంగా ప్రముఖ టాలీవుడ్ సింగర్ సునీత మాట్లాడుతూ.. ‘‘నేను అందరికీ ఒక విషయం గురించి క్లారిటీగా చెబుతున్నాను. చైతన్య అనే వ్యక్తి నా మేనల్లుడినని చెప్పి, సినిమా రంగంలోని కొందరు ప్రముఖులతో పరిచయాలు పెంచుకుంటున్నాడట. సినిమా ఛాన్సులు ఇప్పిస్తానంటూ అమాయకుల దగ్గర డబ్బులు వసూలు చేస్తున్నాడని తెలిసి షాకయ్యాను. నాకసలు చైతన్య అనే మేనల్లుడే లేడు. అసలు ఆ వ్యక్తి ఎవరో కూడా నాకు తెలియదు. దయచేసి అతని మాటలు నమ్మి ఎవరూ మోసపోకండి. ఫిల్మ్ నగర్లో ప్రతి రోజూ ఇలాంటి మోసాలు జరుగుతున్నట్లుగా వార్తలొస్తూనే ఉన్నాయి. అయినా ఎలా మోసపోతున్నారో అర్ధం కావడం లేదు. ఫలానా సినిమా హీరోయిన్ నా బంధువు అనగానే ఎందుకు వారికి డబ్బులిచ్చి మోసపోతున్నారు.? కొంచమైనా ఆలోచించరా.? బయటి వ్యక్తులెవరైనా ఈవిధంగా మాయ మాటలు చెప్పి సినిమా ఛాన్సులు ఇప్పిస్తామని మిమ్మలను నమ్మించే ప్రయత్నం చేస్తే ఇకనుంచైనా కాస్త ఆలోచించండి. డబ్బులు పోగొట్టుకోండి.’ అని సునీత తెలియజేశారు.