Meghalaya Honeymoon Case : ‘అమ్మా, నేనే స్వయంగా వెళ్తా’.. మేఘాలయ హనీమూన్ కేసులో రాజా రఘువంశీ తల్లికి సోనమ్ బ్రదర్ ప్రామిస్!

మేఘాలయలో జరిగిన హనీమూన్ హత్య కేసు దేశవ్యాప్తంగా సంచలనం సృష్టించింది. భర్త రాజా రఘువంశీని హనీమూన్ పేరుతో మేఘాలయ తీసుకెళ్లి, కిరాయి హంతకులతో భార్య సోనమ్ హత్య చేయించిందని తెలియడంతో అందరూ దిగ్భ్రాంతికి గురయ్యారు. ఈ దారుణ ఘటన అందరి హృదయాలను కలచివేసింది. ప్రియుడి కోసం సోనమ్ ఇంతటి ఘాతుకానికి ఒడిగట్టిందని తెలిసి అందరూ ఆశ్చర్యపోయారు. రాజా రఘువంశీ హత్యతో అతని కుటుంబంలో విషాదం నెలకొంది. మృతుడి తల్లి కన్నీరుమున్నీరుగా విలపిస్తూ, “నా కొడుకు ఏం తప్పు చేశాడు? ఎందుకు చంపేశారు?” అని రోదిస్తూ గుండెలు బాదుకుంది.

ఈ నేపథ్యంలో, నిందితురాలు సోనమ్ రఘువంశీ సోదరుడు గోవింద్ ఇండోర్‌కు వెళ్ళాడు. రాజా కుటుంబాన్ని కలిసి, రాజా తల్లి ఉమను చూడగానే కన్నీళ్లు పెట్టుకున్నాడు. ఇద్దరూ ఒకరినొకరు ఓదార్చుకుంటూ బోరున విలపించారు.

గోవింద్ రాజా తల్లికి క్షమాపణ చెప్పాడు. ఆమెను ‘అమ్మా’ అని పిలిచి ఓదార్చాడు. అంతేకాదు, విచారణకు స్వయంగా హాజరవుతానని, సోనమ్‌కు శిక్ష పడేలా చూస్తానని రాజా తల్లికి వాగ్దానం చేశాడు. ఇది వినగానే రాజా తల్లి గుండె కాస్త శాంతించింది.

హనీమూన్‌కు వెళ్లిన రాజా కనిపించకుండా పోయాడని తెలియగానే గోవింద్ వెంటనే షిల్లాంగ్‌కు వెళ్ళాడు. సోనమ్ కోసం వెతికాడు. ఎడతెరిపి లేకుండా వర్షం కురుస్తున్నా లెక్కచేయకుండా సోదరి కోసం గాలించాడు. చివరికి సోనమ్ బతికే ఉందని తెలుసుకుని ఉత్తరప్రదేశ్‌లోని ఘాజీపూర్‌కు వెళ్ళాడు. భర్తను చంపించిందనే అనుమానంతో పోలీసులు సోనమ్‌ను అరెస్ట్ చేయడంతో ఆమెకు సహాయం చేయడానికి గోవింద్ ప్రయత్నించాడు.

గోవింద్‌ను చూడగానే రాజా తల్లి ఉమ దుఃఖంతో కుప్పకూలిపోయింది. “సోనమ్ ఇలా చేస్తుందని కలలో కూడా ఊహించలేకపోతున్నాను” అంటూ బోరున విలపించింది. గోవింద్‌ను దగ్గరకు తీసుకుని గుండె పగిలేలా ఏడ్చింది. రాజా రఘువంశీ సోదరుడు విపిన్ రఘువంశీ మాట్లాడుతూ, “సోనమ్ సోదరుడు గోవింద్ మాతో మాట్లాడాడు. మా ఇంటికి వస్తానని చెప్పాడు. చెప్పినట్లే వచ్చాడు. మా అమ్మకు క్షమాపణ చెప్పాడు. సోనమ్ ఏదైనా తప్పు చేసి ఉంటే ఆమెను వదిలేది లేదని చెప్పాడు” అని తెలిపాడు.

బుధవారం, సోనమ్‌ను, మరో నలుగురు నిందితులను పోలీసులు మేఘాలయలోని జిల్లా కోర్టులో హాజరుపరిచారు. హత్య ఎలా జరిగిందో తెలుసుకోవడానికి వారిని కస్టడీకి అప్పగించాలని కోర్టును కోరారు. మధ్యప్రదేశ్ క్రైమ్ బ్రాంచ్ విచారణలో రాజా హత్య కోసం ప్రధాన నిందితుడు, సోనమ్ ప్రియుడు రాజ్ కుష్వాహా హంతకులకు 50 వేలు చెల్లించినట్లు తేలింది.

క్రైమ్ బ్రాంచ్ అధికారి తెలిపిన వివరాల ప్రకారం, “ఈ పథకం అమలు చేయడానికి రాజ్ దుండగులకు 50 వేలు ఇచ్చాడు. హోటల్ బసతో సహా ప్రయాణ ఖర్చులన్నీ భరించాడు. సంఘటన తర్వాత, వారు వేర్వేరు రైళ్లలో ఇండోర్‌కు చేరుకున్నారు. ఆ తర్వాత తమ మొబైల్ ఫోన్‌లను ధ్వంసం చేశారు”.

హత్య జరిగిన సమయంలో సోనమ్ అక్కడే ఉందని ఆరోపణలు ఉన్నాయి. దుండగుల్లో ఒకడైన విశాల్ రాజాపై వెనుక నుండి దాడి చేసి, తలకు రెండు గాయాలు చేశాడు. ఆ తర్వాత ముగ్గురు కలిసి అతని మృతదేహాన్ని లోయలో పడేశారు. హత్య తర్వాత, సోనమ్ సిలిగురి మీదుగా ఇండోర్‌కు పారిపోయి రెండు రోజులు ఒక ఫ్లాట్‌లో ఉంది. ఆ తర్వాత ఉత్తరప్రదేశ్‌కు చేరుకుంది.

గత నెలలో మేఘాలయలో హనీమూన్ సందర్భంగా రాజా, సోనమ్ కనిపించకుండా పోయారని ఫిర్యాదులు వచ్చాయి. ఈ నెల ప్రారంభంలో రాజా మృతదేహాన్ని గుర్తించారు. సోనమ్ సాయంతో రాజా హత్యకు కుట్ర పన్నారనే ఆరోపణలపై పోలీసులు కుష్వాహాను అరెస్ట్ చేశారు. అతను పట్టుబడిన తర్వాత సోనమ్ ఉత్తరప్రదేశ్‌లోని ఒక పోలీస్ స్టేషన్‌లో లొంగిపోయింది.

ఈ కేసులో ఇంకా చాలా విషయాలు వెలుగులోకి రావాల్సి ఉంది. పోలీసులు అన్ని కోణాల్లో దర్యాప్తు చేస్తున్నారు.