జంబలకడిపంబతో ఊగిపోయిన టెంపుల్ సిటీ.. గంగమ్మ జాతర సందడి మామూలుగా లేదు!

ఆధ్యాత్మిక నగరం తిరుపతి ప్రస్తుతం గంగమ్మ జాతర వేడుకలతో కళకళలాడుతోంది. తిరుపతి గ్రామ దేవతగా భావించే తాతయ్యగుంట గంగమ్మ అమ్మవారి జాతర ప్రతి వీధిలో భక్తి ఉత్సాహాన్ని నింపుతోంది. మే 4న చాటింపు కార్యక్రమంతో ప్రారంభమైన ఈ వేడుకలు వారం రోజులుగా డప్పుల మోతలు, సాంస్కృతిక ప్రదర్శనలు, భక్తుల కోలాహలంతో కొనసాగుతున్నాయి. రాష్ట్ర పండుగగా గుర్తింపు పొందిన ఈ జాతరకు వేలాది మంది భక్తులు తరలివస్తున్నారు.

జాతర ప్రారంభానికి ముందు తిరుపతి పొలిమేర్లలో సంప్రదాయ ప్రకారం అష్టదిగ్బంధనం నిర్వహించారు. అవిలాల గ్రామం నుంచి అమ్మవారికి సారె తీసుకువచ్చి ఆలయంలో ప్రత్యేక పూజలు నిర్వహించారు. అనంతరం గంగమ్మకు వడిబాలు కట్టడంతో జాతర ఉత్సాహం మరింత పెరిగింది. ఆలయ పరిసరాల్లో టీటీడీ, దేవాదాయ శాఖలు భక్తులకు అవసరమైన అన్ని సదుపాయాలు కల్పించాయి.

ఈ జాతరలో ప్రత్యేక ఆకర్షణ భక్తులు ధరించే వేషధారణలే. ప్రతి రోజు ఒక్కో వేషంతో అమ్మవారిని దర్శించుకోవడం ఎన్నో ఏళ్లుగా కొనసాగుతున్న ఆనవాయితీ. బైరాగి, బండ, తోటి, దొర, మాతంగి వేషాలతో భక్తులు జాతరలో సందడి చేశారు. కొందరు శరీరమంతా విభూది పూసుకుని, మరికొందరు పూలమాలలు ధరించి మొక్కులు చెల్లించారు. పురుషులు స్త్రీల వేషాల్లో కనిపిస్తూ గంగమ్మను కొలిచే దృశ్యాలు ప్రత్యేక ఆకర్షణగా నిలిచాయి.

జాతరలో మొదటి మూడు రోజులు భక్తులు సంప్రదాయ ప్రకారం బూతులు తిడుతూ అమ్మవారిని ఆరాధించడం ప్రత్యేకతగా చెబుతారు. ఇది స్థానిక సంప్రదాయంలో భాగమని పెద్దలు చెబుతున్నారు. ఆ తర్వాత రోజులలో పూలంగి సేవలు, సాంస్కృతిక కార్యక్రమాలు, ప్రత్యేక పూజలు కొనసాగుతున్నాయి. రాష్ట్ర మంత్రి సత్యకుమార్ యాదవ్‌తో పాటు పలువురు ప్రముఖులు గంగమ్మకు సారె సమర్పించారు. అలాగే టీటీడీ తరఫున కూడా అమ్మవారికి సంప్రదాయ బహుమతులు అందజేశారు.

ఈ ఏడాది తొలిసారిగా కాణిపాకం వరసిద్ధి వినాయక స్వామి ఆలయం తరఫున కూడా గంగమ్మకు సారె సమర్పించడం విశేషంగా మారింది. దర్శకుడు బోయపాటి శ్రీను సహా పలువురు ప్రముఖులు జాతరలో పాల్గొని ప్రత్యేక పూజలు చేశారు. జాతర చివరి రోజుల్లో సున్నపు కుండల వేషాలు, వెయ్యికళ్ల దుత్తలు, పొంగళ్ల సమర్పణ వంటి కార్యక్రమాలు భారీగా నిర్వహించనున్నారు.

తిరుపతి నగరమంతా ప్రస్తుతం గంగమ్మ జాతర రంగులతో కళకళలాడుతోంది. గ్రామీణ సంప్రదాయాలు, భక్తి, సాంస్కృతిక కళల సమ్మేళనంగా ఈ వేడుక ప్రతి ఏడాది ప్రత్యేక గుర్తింపును తెచ్చుకుంటోంది.