అండమాన్ సముద్రంలో విషాదం.. 250 మంది గల్లంతు

అండమాన్ సముద్రంలో ఘోర పడవ ప్రమాదం చోటుచేసుకుని వందలాది ప్రాణాలు ఆందోళన కలిగిస్తున్నాయి. రోహింగ్యా శరణార్థులు, బంగ్లాదేశ్ పౌరులతో ప్రయాణిస్తున్న ఓ ట్రాలర్ మునిగిపోవడంతో దాదాపు 250 మంది గల్లంతయ్యారు. చిన్నారులు సహా పెద్ద సంఖ్యలో ప్రయాణికులు ఉండటంతో ఈ ఘటన తీవ్ర విషాదంగా మారింది.

ఐక్యరాజ్య సమితి శరణార్థుల హైకమిషనర్ మరియు ఇంటర్నేషనల్ ఆర్గనైజేషన్ ఫర్ మైగ్రేషన్ సంయుక్తంగా విడుదల చేసిన ప్రకటన ప్రకారం, ఈ పడవ బంగ్లాదేశ్ దక్షిణ ప్రాంతమైన టెక్నాఫ్ నుంచి మలేషియాకు బయలుదేరింది. ప్రయాణ సమయంలో బలమైన గాలులు, భారీ అలలు, అలాగే పడవలో అధిక సంఖ్యలో ప్రయాణికులు ఉండటం ప్రమాదానికి ప్రధాన కారణాలుగా భావిస్తున్నారు.

ఈ పడవ ఏప్రిల్ ప్రారంభంలోనే ప్రయాణం ప్రారంభించినట్లు సమాచారం. బంగ్లాదేశ్‌లోని కాక్స్ బజార్ శరణార్థ శిబిరాల నుంచి మెరుగైన జీవనావకాశాల కోసం మలేషియాకు వెళ్లే ప్రయత్నంలో ఈ ఘటన చోటుచేసుకుంది. ప్రస్తుతం గల్లంతైన వారిని గుర్తించేందుకు సముద్రంలో గాలింపు చర్యలు కొనసాగుతున్నాయి.

రోహింగ్యాలు మయన్మార్‌కు చెందిన ముస్లిం మైనారిటీ వర్గం. 2017లో అక్కడ జరిగిన హింసాత్మక ఘటనల తర్వాత లక్షలాది మంది ప్రాణభయంతో బంగ్లాదేశ్‌కు వలస వెళ్లి శరణార్థ శిబిరాల్లో నివసిస్తున్నారు. ఆ పరిస్థితుల నుంచి బయటపడేందుకు ప్రమాదకర సముద్ర ప్రయాణాలను ఆశ్రయించడం తరచుగా ఇలాంటి దుర్ఘటనలకు దారితీస్తోంది.

ఈ తాజా ప్రమాదం మరోసారి శరణార్థుల సమస్య ఎంత తీవ్రమైందో ప్రపంచానికి గుర్తు చేస్తోంది. గల్లంతైన వారిని సురక్షితంగా కనుగొనాలని అంతర్జాతీయ సంస్థలు ఆశాభావం వ్యక్తం చేస్తున్నాయి.