ఇంట్లో ఈ ఫోటోలు పెడితే లక్ష్మీ కటాక్షం అంటున్న వాస్తు నిపుణులు!

భారతీయ ఇళ్లలో ఫోటోలు, దేవతా చిత్రాలకు ప్రత్యేక స్థానం ఉంటుంది. చాలా మంది ఇంట్లో అందంగా కనిపించేందుకు మాత్రమే కాకుండా, సానుకూల వాతావరణం కోసం కూడా కొన్ని ప్రత్యేక చిత్రాలను ఏర్పాటు చేస్తుంటారు. వాస్తు శాస్త్రం ప్రకారం ఇంట్లో పెట్టే కొన్ని ఫోటోలు కుటుంబంలో ఆనందం, ఆర్థిక స్థిరత్వం, ప్రశాంతత పెరగడానికి దోహదపడతాయని నమ్మకం. ముఖ్యంగా హాల్‌, బెడ్‌రూమ్‌, పిల్లల గదుల్లో పెట్టే చిత్రాలు ఇంటి వాతావరణంపై ప్రభావం చూపుతాయని వాస్తు నిపుణులు చెబుతున్నారు.

ఇంటి హాల్‌లో హంసలు, కొంగలు లేదా ప్రకృతి అందాలను ప్రతిబింబించే ఫోటోలు ఉంచడం శుభప్రదంగా భావిస్తారు. అలాగే శ్రీదేవి, భూదేవి సమేత వెంకటేశ్వర స్వామి చిత్రపటం ఇంటికి ఆధ్యాత్మిక వాతావరణాన్ని తీసుకువస్తుందని నమ్మకం. ఉదయించే సూర్యుడు లేదా గరుత్మంతుడు చిత్రాలు కెరీర్‌లో పురోగతికి సూచికలుగా చెబుతారు. వెదురు మొక్కను హాల్‌లో సరైన దిశలో ఉంచితే ఇంట్లో సానుకూల శక్తి పెరుగుతుందని విశ్వసిస్తారు.

పిల్లల గదిలో పర్వతాలు, ప్రకృతి దృశ్యాలు లేదా తెల్లని పూల చిత్రాలు ఉంచడం వల్ల వారిలో ఆత్మవిశ్వాసం, ఏకాగ్రత పెరుగుతాయని చెబుతున్నారు. అలాగే బెడ్‌రూమ్‌లో జంట పక్షులు, జంట బాతుల ఫోటోలు దంపతుల మధ్య ప్రేమాభిమానాలను పెంచుతాయని వాస్తు నమ్మకం. దానిమ్మ పండు పోస్టర్‌ను ఐశ్వర్యానికి ప్రతీకగా భావిస్తారు. చిన్న పిల్లల ఫోటోలు సంతాన సౌభాగ్యానికి మంచివని కూడా చాలామంది విశ్వసిస్తారు.

అయితే కొన్ని ఫోటోలను ఇంట్లో పెట్టకుండా ఉండాలని వాస్తు నిపుణులు సూచిస్తున్నారు. ముఖ్యంగా క్రూర జంతువులు, యుద్ధ దృశ్యాలు, భారీ జలపాతాల చిత్రాలు మానసిక ప్రశాంతతను దెబ్బతీస్తాయని చెబుతున్నారు. ఇంట్లో ఆవు-దూడ ఫోటోను ఉంచడం మాత్రం కుటుంబ ఐక్యత, అదృష్టానికి సూచికగా భావిస్తారు. అయితే ఇవన్నీ సంప్రదాయ విశ్వాసాల ఆధారంగా ఉన్న సూచనలు మాత్రమేనని, వ్యక్తిగత నమ్మకాల ప్రకారం పాటించాలని నిపుణులు చెబుతున్నారు.