పీవీ సింధు కంటి పక్కన కనిపించిన పరికరం ఏంటి?.. క్రీడలో కొత్త టెక్నాలజీపై ఆసక్తికర చర్చ

డెన్మార్క్‌లో జరుగుతున్న ఉబెర్ కప్‌లో భారత స్టార్ షట్లర్ పి.వి. సింధు తన ఆటతో పాటు మరో కారణంతో కూడా అందరి దృష్టిని ఆకర్షించారు. మ్యాచ్ సందర్భంగా ఆమె కంటి పక్కన కనిపించిన చిన్న స్టిక్కర్ లాంటి పరికరం సోషల్ మీడియాలో పెద్ద చర్చకు దారితీసింది. అది ఏంటి? ఎందుకు ఉపయోగిస్తున్నారు? అనే ప్రశ్నలు అభిమానుల్లో ఆసక్తి రేపాయి.

సింధు ధరించిన ఆ పరికరం పేరు ‘టెంపుల్’. ఇది ఒక ఆధునిక వేరబుల్ టెక్నాలజీ డివైజ్. సాధారణ ఫిట్‌నెస్ ట్రాకర్లలాగా కేవలం గుండె వేగాన్ని మాత్రమే కాకుండా, మెదడు పనితీరును కూడా పరిశీలించగల సామర్థ్యం దీనికి ఉంది. ముఖ్యంగా మెదడుకు రక్త ప్రసరణ, నాడీ వ్యవస్థ స్పందన, మానసిక ఒత్తిడి వంటి అంశాలను ఇది రియల్ టైమ్‌లో ట్రాక్ చేస్తుంది.

ఇటీవల శిక్షణ సమయంలో ఈ పరికరాన్ని ఉపయోగిస్తున్న సింధు, మొదటిసారిగా అంతర్జాతీయ మ్యాచ్‌లో కూడా దీన్ని ధరించారు. క్రీడాకారుల పనితీరును మెరుగుపరచడంలో ఈ టెక్నాలజీ ఎంతవరకు సహాయపడుతుందో తెలుసుకునే ప్రయత్నంలో భాగంగా ఈ ప్రయోగం జరుగుతోంది.

ఈ పరికరాన్ని అభివృద్ధి చేస్తున్నది ప్రముఖ వ్యాపారవేత్త దీపిందర్ గోయల్ బృందం. జొమాటో వ్యవస్థాపకుడిగా పేరుపొందిన ఆయన, ఇప్పుడు స్పోర్ట్స్ టెక్నాలజీ రంగంలో కూడా కొత్త ప్రయోగాలకు శ్రీకారం చుడుతున్నారు. ఈ డివైజ్ అభివృద్ధిలో సింధు కూడా భాగస్వామ్యంగా ఉండటం విశేషం.

చిన్న పరిమాణంలో ఉండే ఈ పరికరం బ్లూటూత్ ద్వారా పనిచేస్తుంది. ఒకసారి చార్జ్ చేస్తే కొన్ని రోజుల పాటు ఉపయోగించవచ్చు. క్రీడాకారుల శారీరక స్థితి మాత్రమే కాకుండా, మానసిక ఒత్తిడిని కూడా అంచనా వేయగలగడం దీని ప్రత్యేకత. ముఖ్యంగా నిద్ర సమయంలో మెదడు ఎలా స్పందిస్తుందో కూడా ఇది గుర్తిస్తుంది.

ప్రస్తుతం ఈ ‘టెంపుల్’ పరికరం టెస్టింగ్ దశలో ఉంది. మార్కెట్లో అందుబాటులోకి రావడానికి ఇంకా సమయం పట్టే అవకాశం ఉంది. అయితే ఈ తరహా టెక్నాలజీలు భవిష్యత్తులో క్రీడాకారుల శిక్షణ విధానాన్ని పూర్తిగా మార్చే అవకాశముంది.