ప్రపంచ ఆస్తమా దినోత్సవం 2026: ఆస్తమా నియంత్రణకు మందులే కాదు.. ఆహారం కూడా కీలకం!

ప్రపంచ ఆస్తమా దినోత్సవం 2026 సందర్భంగా శ్వాసకోశ ఆరోగ్యంపై అవగాహన పెంపొందించేందుకు ప్రపంచవ్యాప్తంగా కార్యక్రమాలు జరుగుతున్నాయి. ప్రతి సంవత్సరం మే నెల మొదటి మంగళవారం జరుపుకునే ఈ దినోత్సవం, ఆస్తమా వంటి దీర్ఘకాలిక వ్యాధులపై ప్రజల్లో చైతన్యం కల్పించడం లక్ష్యంగా పెట్టుకుంది. నిపుణుల మాటల్లో, మందులతో పాటు జీవనశైలి, ముఖ్యంగా ఆహారం కూడా ఆస్తమా నియంత్రణలో కీలక పాత్ర పోషిస్తుంది.

ఆస్తమా అనేది శ్వాసనాళాల్లో వాపు ఏర్పడి, శ్వాస తీసుకోవడంలో ఇబ్బందులు కలిగించే దీర్ఘకాలిక సమస్య. వాతావరణ కాలుష్యం, అలర్జీలు మాత్రమే కాదు, మనం తీసుకునే ఆహారం కూడా లక్షణాల తీవ్రతపై ప్రభావం చూపుతుందని వైద్యులు చెబుతున్నారు. అందుకే సరైన ఆహారపు అలవాట్లు అలవరచుకోవడం అవసరమని సూచిస్తున్నారు.

ఆహారంలో విటమిన్ D అధికంగా ఉండే పదార్థాలు చేర్చడం వల్ల రోగనిరోధక శక్తి మెరుగుపడటంతో పాటు శ్వాసనాళాల వాపు తగ్గే అవకాశముంది. పాలు, గుడ్లు వంటి ఆహారాలతో పాటు సూర్యరశ్మి కూడా దీనికి సహజ వనరుగా ఉపయోగపడుతుంది. అలాగే యాంటీ ఆక్సిడెంట్లు ఎక్కువగా ఉండే పండ్లు, కూరగాయలు తీసుకోవడం ఊపిరితిత్తుల కణాలను రక్షించడంలో సహాయపడుతుంది.

మెగ్నీషియం ఉన్న ఆహారాలు కూడా ఆస్తమా ఉన్నవారికి ఉపయోగకరంగా ఉంటాయి. ఇవి శ్వాసనాళాల కండరాలను సడలించి శ్వాస తీసుకోవడాన్ని సులభతరం చేస్తాయి. బాదం, ఆకుకూరలు, తృణధాన్యాలు ఇందుకు మంచి వనరులు. అదనంగా ఒమేగా-3 ఫ్యాటీ యాసిడ్స్ ఉన్న చేపలు, అవిసె గింజలు, వాల్‌నట్స్ తీసుకోవడం వల్ల శరీరంలో వాపు తగ్గించడంలో సహాయపడుతుంది.

ఇక కొన్ని ఆహారాలను మాత్రం పరిమితంగా తీసుకోవడం లేదా పూర్తిగా నివారించడం మంచిదని నిపుణులు హెచ్చరిస్తున్నారు. ప్యాక్ చేసిన ఆహారాల్లో ఉండే ప్రిజర్వేటివ్స్ శ్వాసకోశ సమస్యలను పెంచే అవకాశం ఉంది. అలాగే ఉప్పు అధికంగా ఉండే ఆహారం కూడా వాపును పెంచవచ్చని పరిశోధనలు సూచిస్తున్నాయి. గ్యాస్ కలిగించే ఆహారాలు తీసుకోవడం వల్ల పొట్ట ఉబ్బరంతో శ్వాసలో ఇబ్బందులు రావచ్చు.

మొత్తానికి ఆస్తమా పూర్తిగా నయం కాకపోయినా, సరైన ఆహారం, వ్యాయామం, వైద్యుల సూచనలు పాటించడం ద్వారా దీన్ని నియంత్రణలో ఉంచుకోవచ్చు. ధూమపానం దూరంగా ఉంచడం, క్రమం తప్పకుండా చికిత్స కొనసాగించడం, ఆరోగ్యకరమైన ఆహారం తీసుకోవడం ద్వారా ఊపిరితిత్తుల ఆరోగ్యాన్ని మెరుగుపరచుకోవచ్చని నిపుణులు సూచిస్తున్నారు.