గుండెపోటుతో మృతి చెందిన హీరోయిన్.. విషాదంలో ఇండస్ట్రీ !

బాలీవుడ్‌లో మరో విషాదం చోటు చేసుకుంది. ‘కాంటా లగా’ పాటతో దేశవ్యాప్తంగా గుర్తింపు పొందిన నటి షఫాలీ జరివాలా ఆకస్మిక గుండెపోటుతో మరణించారని సమాచారం. ఆమె వయసు కేవలం 42 సంవత్సరాలే. శుక్రవారం రాత్రి ముంబైలో గల తన నివాసంలో ఒక్కసారిగా అస్వస్థతకు గురైన షఫాలీకి ఛాతీలో తీవ్ర నొప్పి రావడంతో భర్త పరాగ్ త్యాగి ఆమెను వెంటనే ఆసుపత్రికి తీసుకెళ్లారు. అయితే అప్పటికే ఆమె గుండెపోటుతో కన్నుమూసినట్లు వైద్యులు ధృవీకరించారు. ప్రస్తుతం ఆమె మృతదేహాన్ని పోస్ట్‌మార్టం కోసం కూపర్ ఆసుపత్రికి తరలించారు.

ఈ వార్త తెలుసుకున్న సినీ ప్రముఖులు, సహనటులు, అభిమానులు తీవ్ర దిగ్బ్రాంతికి గురయ్యారు. సోషల్ మీడియాలో ఆమె మృతి పట్ల పలువురు సంతాపం తెలియజేశారు. గాయని మికా సింగ్ సహా అనేకమంది ప్రముఖులు ఆమె కుటుంబానికి మద్ధతుగా నిలిచారు. చిన్న వయసులోనే ఇలా షఫాలీ చనిపోవడం సినీప్రపంచానికి తీరని లోటుగా అభిప్రాయపడుతున్నారు.

షఫాలీ జరివాలా 2002లో వచ్చిన ‘కాంటా లగా’ పాటతో ఒక్కసారిగా దేశవ్యాప్తంగా క్రేజ్ సంపాదించుకున్నారు. ఈ పాట ఆశా భోస్లే ఆలపించిన క్లాసిక్ నెంబర్‌కి రీమిక్స్ వర్షన్‌గానూ గుర్తింపు పొందింది. పాట విడుదలైన వెంటనే ఆమెకు “కాంటా లగా గర్ల్” అనే బిరుదు కూడా వచ్చినంతగా పేరు తెచ్చింది. తరువాత ‘ముజ్‌సే షాదీ కరోగీ’ సినిమాలో చిన్న పాత్రలో నటించారు. బిగ్ బాస్ సీజన్ 13లో కూడా పాల్గొని ప్రేక్షకుల మనసు గెలుచుకున్నారు.

తెలుగు ప్రేక్షకులకు అంతగా పరిచయం లేకపోయినా, బాలీవుడ్ యూత్‌లో ఆమెకు మంచి ఫాలోయింగ్ ఉంది. హిందీలో కాకపోయినా, కన్నడలో ‘హుడుగారు’ సినిమాలో కూడా నటించారు. కెరీర్ పరంగా తక్కువ సమయంలోనే మంచి గుర్తింపు తెచ్చుకున్న షఫాలీ, వివాహానంతరం కెమెరా దూరంగా ఉండిపోయారు. అప్పుడప్పుడు టెలివిజన్ షోల్లో కనిపిస్తూ వచ్చారు.

ఇలా షఫాలీ జరివాలా ఆకస్మిక మరణం ఆమె కుటుంబసభ్యులు, అభిమానులు, సినీ ప్రముఖుల మధ్య తీవ్ర విషాదాన్ని కలిగించింది. ఆమె చిరునవ్వుతో, అందంతో, ఎనర్జీతో ఎంతో మంది అభిమానుల గుండెల్లో నిలిచిపోయారు. ఆమె ఆత్మకు శాంతి చేకూరాలని బాలీవుడ్ వర్గాలు ప్రార్థిస్తున్నాయి.