Bonalu : తెలంగాణలో బోనాల జాతర షురూ! ఈనెల 26 నుంచి సందడే సందడి!

Bonalu : తెలంగాణలో బోనాల సందడి మొదలు కానుంది! ఈ నెల 26 నుంచి గోల్కొండ బోనాలతో ఈ పండుగ ప్రారంభం కానుంది. ఈ సంవత్సరం హైదరాబాద్‌లో బోనాల పండుగను ఎంతో ఘనంగా నిర్వహించేందుకు ప్రభుత్వం సిద్ధంగా ఉందని దేవాదాయ శాఖ మంత్రి కొండ సురేఖ గారు తెలిపారు.

ఆషాడ బోనాల నిర్వహణపై జరిగిన సమీక్షా సమావేశంలో మంత్రి సురేఖ మాట్లాడారు. బోనాల సమయంలో భక్తులకు ఎలాంటి అసౌకర్యం కలగకుండా అన్ని ఏర్పాట్లు చేయాలని ఆలయ అధికారులకు సూచించారు. ప్రభుత్వం ఇప్పటికే రూ. 20 కోట్ల నిధులు మంజూరు చేసిందని, అవసరమైతే ముఖ్యమంత్రి గారి దృష్టికి తీసుకెళ్లి మరిన్ని నిధులు తెప్పించేందుకు ప్రభుత్వం సిద్ధంగా ఉందని ఆమె అన్నారు.

ఈ సమావేశంలో మంత్రి పొన్నం ప్రభాకర్ గారితో పాటు పలువురు మంత్రులు పాల్గొన్నారు. ప్రతి ఒక్కరూ బోనాల పండుగను సంతోషంగా జరుపుకోవాలని మంత్రి సురేఖ ఆకాంక్షించారు. తెలంగాణ సంస్కృతికి ప్రతీకగా నిలిచే ఈ బోనాల పండుగను అందరూ కలిసి ఆనందంగా జరుపుకుందాం!