ప్లే స్టేషన్ 4 గేమింగ్ కన్సోల్ కావాలంటూ రిక్వెస్ట్ పంపిన బాలునికి సర్ప్రైజ్ ఇచ్చిన సోనూసూద్ !

రీల్‌ లైఫ్‌లో నెగెటివ్‌ షేడ్స్‌ వున్న విలన్ కాస్త రియల్‌ లైఫ్‌ లోకి వచ్చేసరికి రియల్‌ హీరోగా మారిపోతే ఎలా వుంటుంది. ఊహించుకోవడానికే అద్భుతంగా వున్న ఈ అందమైన ఊహ ఇప్పుడు సోషల్ మీడియాలో నిజమై కనబడుతుంది. అవును.. కరోనా కష్టకాలంలో కలియుగ కర్ణుడి అవతారమెత్తారు సోనూసూద్‌. ‘అరుంధతి’, ‘దూకుడు’ చిత్రాలతో టాలీవుడ్ ప్రేక్షకులకు తనదైన శైలిలో పరిచయమైన సోనూసూద్ విలన్ గా నెగెటీవ్ షేడ్స్ ఉన్న పాత్రలు ఎక్కువగా నటించినా.. రియల్ లైఫ్ లో మాత్రం చాలా మంది జీవితాలలో వెలుగును నింపిన ‘సూపర్ హీరో”గా మారిపోయాడు.

‘నేనున్నాననీ.. నీకేం కాదనీ..’ అంటూ కష్ట కాలంలో ఎంతోమందిని ఆదుకుంటున్న సోనూ సూద్ మరోసారి నెటిజన్లందరి దృష్టిని ఆకర్షించాడు. ఈమధ్యనే ఓ బాలుడు అడిగిన ప్రశ్నకు మన రియల్ హీరో సోనూసూద్ ఇచ్చిన సమాధానం అందర్నీ ఆశ్చర్యపరుస్తుంది. ‘ఇంతకీ అసలు ఆ బాలుడు సోనూసూద్ ని ఏమడిగాడు.? ఆ బాలుని ప్రశ్నకు సోనూ సూద్ ఏం సమాధానం చెప్పాడు.? అనే కదా.. మీ సందేహం..?
మరిన్ని వివరాలను తెలుసుకోవాలన్న ఆసక్తి మీకుంటే.. మీరే చదివి తెలుసుకోండి.

కరోనా కాలంలో కష్టాల్లో ఉన్న పేదవాళ్ళకి నేనున్నానంటూ తోచిన సహాయం చేస్తున్న.. రియల్ హీరో సోనూసూద్ కు లేటెస్ట్ గా సోషల్ మీడియాలో విచిత్రమైన అభ్యర్థనలు వస్తున్నాయి. అయితే.. ఆ రిక్వెస్ట్ లను కూడా సరదాగా ఫాలో అవుతూ.. సోనూసూద్ బదులిస్తున్నారనడానికి ఉదాహరణగా.. నీలేశ్ నింబోరే అనే బాలుడిని అభ్యర్ధననే చెప్పవచ్చు. ఈ బాలుడు ఓ విచిత్రమైన కోరిక కోరాడు. ‘తన చుట్టూ ఉన్నవాళ్లందరూ.. ప్లే స్టేషన్ గేమ్స్ ఆడుతుంటే.. తాను మాత్రం ఆ గేమ్స్ ను ఆడలేక చూస్తూ.. ఉండి పోతున్నానని, అలాంటి వీడియో గేమ్ లను ఆడుకోవడానికి వీలుగా.. ప్లే స్టేషన్ -4 గేమింగ్ కన్సోల్ కొనివ్వాలి” అని కోరాడు. సోషల్ మీడియాలో ఈ అభ్యర్ధన బాగా వైరల్ అయ్యింది. లేటెస్టుగా సోనూసూద్ ఈ బాలుని అభ్యర్ధనకు సరదాగా స్పందించారు. “నీ దగ్గర ప్లే స్టేషన్ లేకపోతే ఏం.? నువ్వు నిజంగా అదృష్టవంతుడివి. కొన్ని పుస్తకాలు తెచ్చుకో.. చదువుకో.. పుస్తకాల కోసం సహాయం చేయమంటే.. తప్పకుండా చేస్తాను” అంటూ ఎవరూ ఊహించని విధంగా సమాధానం ఇచ్చారు.