సరోగసి ముసుగులో చైల్డ్ ట్రాఫికింగ్‌.. డీసీపీ రష్మి పెరుమాళ్ సంచలన వ్యాఖ్యలు!

సికింద్రాబాద్: హైదరాబాద్‌లోని ప్రముఖ సృష్టి టెస్ట్ ట్యూబ్ బేబీ సెంటర్‌లో చోటుచేసుకున్న ఘోర వైద్య మోసం సామాన్యులను తీవ్రంగా కలవరపెడుతోంది. సంతాన ఆశతో ఈ కేంద్రాన్ని ఆశ్రయించిన ఓ దంపతులకు జరిగిన అన్యాయం ఇప్పుడు రాష్ట్రవ్యాప్తంగా చర్చనీయాంశమైంది. ఈ సంఘటనలో సెంటర్ నిర్వాహకురాలు డాక్టర్ నమ్రతతో పాటు ఇద్దరు ల్యాబ్ టెక్నీషియన్లను పోలీసులు అరెస్ట్ చేశారు. ఈ ఘటనపై సికింద్రాబాద్‌లోని గోపాలపురం పోలీస్ స్టేషన్‌లో కేసు నమోదైంది.

డీఎన్‌ఏ వివాదం, పోలీసుల దర్యాప్తు

ఈ కేసు వివరాల్లోకి వెళితే, సంతానం కోసం ప్రయత్నిస్తున్న ఓ మహిళ IVF (ఇన్ విట్రో ఫెర్టిలైజేషన్) ప్రక్రియ కోసం భర్త వీర్యకణాలను ఉపయోగించాలని కోరింది. అయితే సృష్టి సెంటర్ నిర్వహించిన ఈ ప్రక్రియలో మరో వ్యక్తి వీర్య కణాలను ఉపయోగించి శిశువును గర్భంలో నెలకొల్పినట్టు తెలుస్తోంది. ఈ విషయాన్ని ముందుగా గుర్తించలేకపోయిన దంపతులు, పుట్టిన శిశువుకు క్యాన్సర్ లక్షణాలు కనిపించడంతో అనుమానించారు. ఆ తర్వాత వారు డీఎన్‌ఏ పరీక్షలు చేయించగా, శిశువు డీఎన్‌ఏ భర్త డీఎన్‌ఏతో సరిపోలకపోవడం వల్ల ఈ తతంగం వెలుగులోకి వచ్చింది.

ఈ మోసాన్ని నిర్ధారించిన దంపతులు వెంటనే పోలీసులకు ఫిర్యాదు చేయగా, గోపాలపురం పోలీసులు తక్షణమే స్పందించారు. నిన్న మధ్యాహ్నం నుంచి పోలీసులు, రెవెన్యూ అధికారులు, వైద్య ఆరోగ్య శాఖ అధికారులు సంయుక్తంగా సృష్టి టెస్ట్ ట్యూబ్ బేబీ సెంటర్‌పై తనిఖీలు నిర్వహించారు. ఇందులో భాగంగా ల్యాబ్‌లో ఉన్న పలు IVF శాంపిల్స్, టెస్ట్ కిట్లను స్వాధీనం చేసుకున్నారు. ల్యాబ్‌లో అనుమానాస్పదంగా నిల్వ ఉంచిన వీర్య కణాల వివరాలను కూడా సేకరించారు.

చైల్డ్ ట్రాఫికింగ్ కోణం, సంచలన విషయాలు వెల్లడి

తాజాగా ఈ కేసులో సంచలన విషయాలు వెలుగులోకి వచ్చాయి. నార్త్ జోన్ డీసీపీ రష్మి పెరుమాళ్ వెల్లడించిన వివరాల ప్రకారం, ఈ కేసులో చైల్డ్ ట్రాఫికింగ్ కోణం కూడా ఉన్నట్లు పోలీసులు అనుమానిస్తున్నారు. సరోగసి కోసం డా. నమ్రతను ఆశ్రయించిన దంపతులకు వేరే బిడ్డను ఇచ్చేందుకు ప్రయత్నం జరిగింది.

పోలీసుల విచారణలో, సృష్టి క్లినిక్ వేరే మహిళకు పుట్టిన బిడ్డను తీసుకొచ్చి, దానిని సరోగసి ద్వారా పుట్టిందని దంపతులను నమ్మించినట్లు తేలింది. దీని కోసం ఢిల్లీకి చెందిన ఒక గర్భిణిని విమానంలో విశాఖపట్నంకు తీసుకొచ్చి డెలివరీ చేయించారు. ఆ బిడ్డను సరోగసిగా చూపించి, ఆంధ్రప్రదేశ్‌కు చెందిన ఓ దంపతుల వద్ద నుండి రూ. 40 లక్షలు వసూలు చేశారని దర్యాప్తులో వెల్లడైంది.

కాగా, బిడ్డను ప్రసవించిన ఢిల్లీ మహిళకు కేవలం రూ.90,000 మాత్రమే ఇచ్చినట్లు కూడా పోలీసులు గుర్తించారు. ఇవన్నీ సరోగసి పేరిట నిర్వహించిన నకిలీ లావాదేవీలేనని అధికారులు భావిస్తున్నారు. డీసీపీ రష్మి పెరుమాళ్ ఈ విషయమై మాట్లాడుతూ, “ఇది కేవలం మోసం మాత్రమే కాదు.. చైల్డ్ ట్రాఫికింగ్‌ కూడా స్పష్టంగా కనిపిస్తోంది. వేరే మహిళ నుంచి పుట్టిన బిడ్డను సరోగసిగా చూపించడం సీరియస్ నేరం. ఇది మనుషుల అక్రమ రవాణాలో ఒక భాగం” అని పేర్కొన్నారు.

నమ్రతపై ఇప్పటికే రెండు రాష్ట్రాల్లో 10కి పైగా కేసులు నమోదయ్యాయని డీసీపీ వెల్లడించారు. IVF పద్ధతిలో వైఫల్యాలు, నకిలీ సరోగసి ఒప్పందాలు, అక్రమ డబ్బు లావాదేవీలు—ఇవి ఈ కేసులో కీలక అంశాలుగా ఉన్నట్లు తెలిపారు. అంతేగాక, బాధితులు పోలీసులకు ఫిర్యాదు చేయకుండా ఉండేందుకు నమ్రత పలు రకాలుగా బెదిరింపులకు పాల్పడినట్టు తెలుస్తోంది. ఆమె తన కొడుకు జయంత్ అడ్వకేట్ కావడాన్ని అడ్డుగాగా చూపి కోర్టు కేసుల పేరుతో బాధితులను భయపెట్టినట్లు సమాచారం.

అరెస్టులు, ఇతర బ్రాంచ్‌లపై విచారణ

డాక్టర్ నమ్రతతో పాటు ఇద్దరు ల్యాబ్ టెక్నీషియన్లను పోలీసులు అదుపులోకి తీసుకుని గోపాలపురం స్టేషన్‌కి తరలించారు. విచారణలో ఈ మోసం మరింత విస్తృతంగా జరిగినట్టు పోలీసులకు సమాచారం లభించింది. హైదరాబాద్‌లోని సికింద్రాబాద్ బ్రాంచ్‌తో పాటు విజయవాడ, విశాఖపట్నం బ్రాంచుల్లో కూడా ఇదే విధంగా IVF చికిత్సల పేరుతో అనేక రోగుల విశ్వాసాన్ని దెబ్బతీసినట్టు సమాచారం. పోలీసు బృందాలు ఈ కేంద్రాలపై కూడా తనిఖీలు చేపట్టి సరోగసీ కోసం నిల్వ ఉంచిన అనుమానాస్పద వీర్య శాంపిల్స్‌ను గుర్తించారు.

ప్రస్తుతం ఈ కేసులో మొత్తం ఏడుగురిని పోలీసులు అదుపులోకి తీసుకున్నారు. వారిపై IPC సెక్షన్లతోపాటు మెడికల్ నెగ్లిజెన్స్, మానవహక్కుల ఉల్లంఘన తదితర నేరాల కింద కేసులు నమోదు చేశారు. మరిన్ని వివరాలు ఇంకా వెలుగులోకి రావాల్సి ఉంది.

వైద్య నైతికత, నిఘా అవసరం

వైద్యంలో నైతికత, బాధ్యత, రోగి గోప్యతకు ఎదురుగొచ్చే ఈ తరహా ఘటనలు సామాజికంగా తీవ్ర ఆందోళనకు దారితీస్తున్నాయి. ప్రభుత్వ మద్దతుతో నడుస్తున్న ప్రైవేట్ ఫెర్టిలిటీ సెంటర్లపై కఠిన నిఘా అవసరం ఎంతైనా ఉందని నిపుణులు చెబుతున్నారు.