Tollywood Top Stars : తెలుగు టాప్ స్టార్స్ అంతా ఒకే పాటలో కనిపించి.. అభిమానులను ఆశ్చర్య పరిచిన సినిమా ఏమిటో మీకు తెలుసా..?!

హీరో వెంకటేష్ సినీ పరిశ్రమలోకి అడుగు పెట్టిన రెండో సంవత్సరం అప్పటికే ఆయన కలియుగ పాండవులు, బ్రహ్మ రుద్రులు, భారతంలో అర్జునుడు, అజేయుడు లాంటి చిత్రాలు చేసి ఉన్నారు. 1987లో సుబ్బిరామిరెడ్డి నిర్మాణ సారథ్యంలో మురళీ మోహన్ రావు దర్శకత్వం వహించిన త్రిమూర్తులు సినిమాలో వెంకటేష్, అర్జున్, రాజేంద్ర ప్రసాద్, కుష్బూ, శోభన, అశ్విని హీరో హీరోయిన్స్ గా నటించారు. అయితే ఈ సినిమాలో ఇంతకుముందు ఎప్పుడు ఒక పాటలో గాని ఒక సన్నివేశంలో గాని స్టార్స్ మొత్తం కనబడడం అనేది చూడలేదు.

అభిమానులు ఒక స్టార్ హీరో కనబడితేనే ఈల వేస్తారు. ఇద్దరు స్టార్స్ కనబడితే గోల చేస్తారు. ముగ్గురు స్టార్స్ కనబడితే పండగ చేసుకుంటారు. కానీ అభిమానులు ఊహించనంతమంది సినీ స్టార్స్ తెరపై కనబడితే వారి ఆనందానికి ఇక అంతే ఉండదు. అలాంటి అరుదైన ఫీట్ త్రిమూర్తులు సినిమాలో జరిగింది. త్రిమూర్తులు సినిమాకు నిర్మాతగా సుబ్బిరామిరెడ్డి వ్యవహరించారు.

బాలీవుడ్ లో ‌వచ్చిన “నసీబ్” అనే చిత్రంలో బాలీవుడ్ స్టార్స్ అందరూ తెరపై కనబడతారు. అలాంటి రేర్ ఫీట్ తెలుగులో కూడా చేయాలని సుబ్బిరామిరెడ్డి ఆలోచించి.. ముందుగా ఎన్టీ రామారావు, నాగేశ్వరరావులను సంప్రదించారు. ఏవో కారణాల వలన తాము సినిమాలో నటించలేమని చెప్పారు. కానీ వారి వారసులైన బాలకృష్ణ ,నాగార్జునలను పంపించడం జరిగింది.

త్రిమూర్తులు సినిమాలో “ఒకే మాట..ఒకే బాట..” అనే పాటను హీరో వెంకటేష్ పాడుతూ ఉంటారు. ఆ సందర్భంలో ఆంధ్రా అందగాడు శోభన్ బాబు, సూపర్ స్టార్ కృష్ణ,రెబల్ స్టార్ కృష్ణంరాజు, మెగాస్టార్ చిరంజీవి, యువరత్న బాలకృష్ణ, యువ సామ్రాట్ నాగార్జున, మురళీమోహన్, చంద్రమోహన్… వీరికి సరిజోడిగ విజయ నిర్మల, శారద, విజయశాంతి, జయమాలిని, రాధా, రాధికలతో పాటుగా పరుచూరి బ్రదర్స్, మిగతా దర్శక, నిర్మాతలు కనబడతారు. వీరితో పాటుగా ఇదే సినిమాలో మల్టీస్టారర్స్ వెంకటేష్, అర్జున్, రాజేంద్ర ప్రసాద్, శోభన, అశ్విని సినిమా మొత్తంగా కనబడడం ఆనాటి ప్రేక్షకుల ఆనందానికి అవధులు లేకుండా పోయింది. ఈ సినిమా తర్వాత మళ్లీ ఏ సినిమాలో టాప్ స్టార్స్ కనబడడం అనేది జరగలేదు.