“పబ్‌లు, క్లబ్‌లకు రాను అన్నావ్ కదా.. మరి లీలా ప్యాలెస్‌లో ప్రెస్‌మీట్ ఎందుకు?”: రేవంత్ రెడ్డిపై హరీష్ రావు విమర్శలు

హైదరాబాద్: తెలంగాణ ముఖ్యమంత్రి రేవంత్ రెడ్డి పబ్బులు, క్లబ్‌లు, 5 స్టార్ హోటళ్లకు వెళ్లనని గతంలో చేసిన వ్యాఖ్యలపై బీఆర్ఎస్ నేత హరీష్ రావు తీవ్ర స్థాయిలో విమర్శలు గుప్పించారు. ఈరోజు ఢిల్లీలో ఏపీ సీఎం చంద్రబాబు నాయుడుతో జరిగిన సమావేశం అనంతరం 7 స్టార్ లీలా ప్యాలెస్ హోటల్‌లో రేవంత్ రెడ్డి ప్రెస్‌మీట్ నిర్వహించడంపై హరీష్ రావు అభ్యంతరం వ్యక్తం చేశారు.

“రేవంత్ రెడ్డి పబ్బులకి, క్లబ్‌లకు, 5 స్టార్ హోటల్లకు రాను అన్నావ్ కదా? ఇవాళ ఢిల్లీలో చంద్రబాబుతో మీటింగ్ పెట్టి 7 స్టార్ లీలా ప్యాలెస్ హోటల్లో ప్రెస్ మీట్ ఎలా పెట్టినవ్?” అని హరీష్ రావు ప్రశ్నించారు.

ముఖ్యమంత్రిగా రేవంత్ రెడ్డి చేసిన ప్రకటనలు, ప్రస్తుత చేతలకు మధ్య వైరుధ్యం ఉందని హరీష్ రావు పరోక్షంగా విమర్శించారు. తెలంగాణలో ప్రభుత్వ పాఠశాలలు, ఆసుపత్రుల అభివృద్ధిపై దృష్టి సారించాలని చెబుతూనే, విలాసవంతమైన హోటళ్లలో ప్రెస్‌మీట్‌లు నిర్వహించడంపై హరీష్ రావు వ్యంగ్యంగా స్పందించారు. ఈ వ్యాఖ్యలు తెలంగాణ రాజకీయ వర్గాల్లో చర్చనీయాంశంగా మారాయి.