జీవితకి డైరెక్షన్ తెలీదు.. ఆయన సపోర్ట్ చేశారు కాబట్టే నెట్టుకొచ్చింది..!

జీవిత రాజశేఖర్ గురించి అందరికీ తెలిసిందే. ఆమె అతి చిన్న వయసులోనే నటిగా మంచి పేరు తెచ్చుకున్నారు. జస్ట్ ప్లస్ టు చదువుతున్నప్పుడే ప్రముఖ తమిళ దర్శకుడు టి.రాజేందర్ ఆమెకి హీరోయిన్‌గా అవకాశం ఇచ్చారు. ఆయన సినిమాలో నటించే హీరోయిన్స్‌కు అప్పట్లో మంచి క్రేజ్ ఉండేది. అంతేకాదు..డైరెక్టర్ టి.రాజేందర్ ఒక అమ్మాయిని హీరోయిన్‌గా ఇండస్ట్రీకి పరిచయం చేస్తున్నారంటే మిగతా దర్శక, నిర్మాతల.. హీరోల దృష్ఠి ఆమె మీద పడేది. అలాగే జీవితను పరిచయం చేస్తున్నారనగానే తమిళ మేనేజర్స్ అంతా ఆరా తీశారు.

జీవిత అసలు పేరు పద్మ. అయితే ఆ పేరు మరీ రొటీన్‌గా ఉందని టి.రాజేందర్ తన మొదటి సినిమా సమయంలోనే నీ పేరు మార్చేద్దం అని అన్నారట. అలా పద్మ కాస్త జీవితగా మారింది. జీవిత అనే పేరుతో అప్పటి వరకు ఇండస్ట్రీలో ఏ హీరోయిన్ లేకపోవడం.. పేరులో మంచి సౌండింగ్ ఉండటం.. ఇలా అన్నీ జీవితకి బాగా కలిసి వచ్చాయి. మొదటి సినిమా రిలీజ్ కాకుండానే 5 సినిమాలకి జీవిత సైన్ చేసింది. అలా తెలుగమ్మాయి అయినప్పటికీ జీవిత తమిళ సినిమా ఇండస్ట్రీలో ఎంట్రీ ఇచ్చి ఒకే ఏడాదిలో 5 సినిమాలకు సైన్ చేయడం విశేషం.

ఈ సినిమాలతో టాలీవుడ్ మేకర్ ఎం.ఎస్.రెడ్డి గారి దృష్ఠిలో పడింది జీవిత. ఓసారి ఆమెను హైదరాబాద్‌కు పిలిపించుకొని మాట్లాడారు. తెలుగు బాగా చదువుతావా అని అడుగుతూ ఓ సీన్ పేపర్ ఇచ్చారు. ఆ పేపర్‌లో ఉన్న డైలాగ్స్‌ను జీవిత చక్కగా చదవడంతో బాగా ఇంప్రెస్ అయిన ఎం.ఎస్.రెడ్డి ..నా సినిమాలో నువ్వే హీరోయిన్ అని చెప్పారట. అలా జీవిత తెలుగులో చేసిన మొదటి సినిమా తలంబ్రాలు. ఈ సినిమాకి కోడి రామకృష్ణ దర్శకత్వం వహించారు. బ్లాక్ బస్టర్ హిట్‌గా నిలిచిన ఈ సినిమా అటు జీవితకి, ఇటు రాజశేఖర్‌కి లైఫ్‌లో మైల్ స్టోన్ మూవీగా  మిగిలింది.

అలా కొన్ని సినిమాల తర్వాత జీవిత – రాజ శేఖర్ పెళ్లి చేసుకున్న విషయం తెలిసిందే. ఇక సొంత నిర్మాణ సంస్థను స్థాపించి రాజశేఖర్ హీరోగా సినిమాలు రూపొందిస్తున్నారు. ఈ క్రమంలో తమిళంలో అగ్ర దర్శకుడు బాలా తెరకెక్కించిన సేరు సినిమా తెలుగు రైట్స్ జీవిత – రాజశేఖర్ దక్కించుకున్నారు. ఈ సినిమా తమిళ వర్షన్‌లో విక్రమ్ నటించి బాగా మెప్పించాడు. తెలుగులో కూడా అలాంటి పేరు రావాలని ఇందులో నటించడానికి రాజశేఖర్ ఆసక్తి చూపించాడు. కానీ దర్శకుడు సెట్ కాలేదు. ఎవరైనా వచ్చినా కూడా కథలో మార్పులు చేద్దామని అన్నారట.

కానీ రాజశేఖర్‌కు కథను ఏమాత్రం మార్చడం ఇష్టం లేదు. దాంతో నువ్వే డైరెక్ట్ చేయి అని జీవితను ఆయన ఎంకరేజ్ చేశారు. అయితే జీవితకు డైరెక్షన్ తెలీదు. దాంతో పూర్తిగా సినిమాటోగ్రాఫర్ హరి అనుమోలు మీద ఆధారపడి ఈ సినిమాను డైరెక్ట్ చేశారు. ఎలాంటి ఫీల్ కావాలి..షాట్ రేంజ్ ఎంత ఉండాలి అనేవి చెప్పగలను గానీ అంతకంటే నాకేమీ తెలీదని సినిమాటోగ్రాఫర్‌తో నిర్మొహమాటంగా జీవిత చెప్పారు. అలా ఆయన సపోర్ట్‌తో జీవిత.. రాజశేఖర్ హీరోగా శేషు సినిమాను తెరకెక్కించారు. కళ్యాణి హీరోయిన్‌గా నటించింది. ఈ సినిమా మంచి వసూళ్ళను రాబట్టి జీవిత సంస్థకు లాభాలను తెచ్చిపెట్టింది.