ఇంట్రెవల్‌కి కథ అయిపోయినా.. లాగి లాగి అల్లు అర్జున్ కెరీర్‌లో ఫస్ట్ 40 కోట్ల హిట్ సినిమాగా నిలిచిన ‘జులాయి’ !

మాటల మాంత్రికుడు త్రివిక్రమ్ శ్రీనివాస్ సినిమాలు కొన్నిటిలో కథ అంతగా ఉండకపోయినా కథనంతో.. మాయ చేసి మాటలతో నడిపించేస్తాడు. తెరనిండా పాత్రలను నింపేసి మంచి కామెడీ ట్రాక్‌తో లాక్కొస్తుంటాడు. చిన్న పాయింట్‌ని రెండున్నర గంటల కథగా తయారు చేసి స్టార్ హీరోలతో సినిమాలు తీసి హిట్ కొడుతున్నారు. కెరీర్ ప్రారంభంలో నాలుగు నుంచి 5 గంటల రష్ ఉండేలా షూటింగ్ చేసేవారని టాక్. దాన్ని ఎడిటి చేయడానికి ఎడిటర్‌కి తల ప్రాణం తోకలోకి వస్తుందని చెప్పుకొనేవారు. స్వయం వరం సినిమాతో రచయితగా టాలీవుడ్‌కి పరిచయమయిన త్రివిక్రమ్ శ్రీనివాస్ నువ్వే కావాలి, మల్లీశ్వరీ, నువ్వు నాకు నచ్చావ్, మన్మధుడు వంటి సినిమాలకి ఫ్యామిలీ మొత్తం కూర్చోని చూసే కథ మాటలను అందించారు.

యంగ్ హీరో తరుణ్ – శ్రియ జంటగా నువ్వే నువ్వే సినిమాతో దర్శకుడిగా మారి హిట్ కొట్టారు. ఆ తర్వాత ఏకంగా సూపర్ స్టార్ మహేష్ బాబు – త్రిష జంటగా అతడు సినిమాని తెరకెక్కించి స్టార్ డైరెక్టర్ గా మారారు. ఈ సినిమా ఓవర్ బడ్జెట్ వల్ల నిర్మాతకి లాభాలు రాకపోయినా..ఇప్పటికీ గొప్ప సినిమాగా చెప్పుకుంటారు. హాలీవుడ్ సినిమా రేంజ్‌లో త్రివిక్రమ్ శ్రీనివాస్ మేకింగ్ ఉంటుంది. ఇక యాక్షన్ సీన్స్ కొన్ని హాలీవుడ్ సినిమా నుంచే తెచ్చి పెట్టాడు. మక్కీకిమక్కీ దింపాడు అనే కామెంట్స్ వచ్చినా అభిమానులు మాత్రం బాగానే ఎంజాయ్ చేశారు.  

అలా త్రివిక్రమ్ శ్రీనివాస్ – అల్లు అర్జున్ కాంబినేషన్‌లో వచ్చిన సినిమా జులాయి. ఈ సినిమా వచ్చి విజయవంతంగా 9 ఏళ్లు పూర్తయింది. అల్లు అర్జున్ ఈ సినిమాకి ముందు చేసిన వరుడు, వేదం సినిమాలు ఆశించినంతగా ఫలితాన్ని ఇవలేదు. అలాంటి సమయంలో ‘జులాయి’ వచ్చింది. ఫస్ట్‌హాఫ్ అదిరిపోయింది. ఈ సినిమాలో కూడా ఇంట్రవెల్ బ్లాక్ హాలీవుడ్ స్థాయిలో తెరకెక్కించాడు. అంతేకాదు ఈ పార్ట్ మొత్తం ఓ హాలీవుడ్ సినిమా నుంచి ఎత్తుకొచ్చిందే. ఇక్కడ ఇంకో విషయం ఏమిటంటే బిట్టు పాయింట్ బ్లాక్‌లో దొరికిపోతాడు. కానీ అక్కడితో కథ ముగిస్తే షార్ట్ ఫిల్మ్  అవుతుందని వాంటెడ్‌గా సెకండ్ హాఫ్ నడపడానికి ఎస్కేప్ చేశారు.

సెకండాఫ్‌లో కథ మొత్తం మనకి తెలిసినట్టే సాగుతుంది. నెక్స్ట్ ఏం జరుగుతుందనేది సామాన్య ప్రేక్షుకుడు చెప్పేయగలడు. కానీ త్రివిక్రమ్ శ్రీనివాస్ తన మెస్మరైజ్డ్ స్క్రీన్‌ప్లేతో ఆడియన్స్‌ని కూర్చోబెట్టాడు. పవర్‌ఫుల్ పంచ్ డైలాగ్స్‌తో ఆడియన్స్ ఎంజాయ్ చేసేలా జులాయి తీసి సక్సెస్ అయ్యాడు. ఇక్కడ ప్లస్ పాయింట్ ఏంటంటే వరుడు, వేదం సినిమాలలో అల్లు అర్జున్ క్యారెక్టర్ సీరియస్‌గా సాగుతుంది. కానీ జులాయిలో పూర్తి భిన్నంగా ఎంటర్‌టైనర్‌గా సాగుతుంది. ఆయన పర్ఫార్మెన్స్ సగం సినిమాకి హిట్ కి కారణం అయింది. 

కథ లేకపోయినా.. మొదటిరోజు కాస్త డివైడ్ టాక్ వచ్చినా విచిత్రంగా 40 కోట్ల వసూళ్ళు రాబట్టి రికార్డ్ క్రియేట్ చేసింది. హీరోయిన్‌గా నటించిన ఇలియానా పుల్లలా, పీలగా ఉన్నా.. రాక్ స్టార్ మ్యూజిక్ హైలెట్ కావడంతో పెద్దగా ఆమెని ఎవరూ పట్టించుకోలేదు. మొత్తానికి ఆ సమయంలో బాక్సాఫీస్ వద్ద గట్టిగా లాగితే 30 కోట్లు వసూళ్ళు తెచ్చిన సినిమాలే ఉన్నాయి. కానీ రికార్డ్ బ్రేక్ స్థాయిలో 40 కోట్లను రాబట్టిన మొదటి సినిమాగా జులాయి నిలవడం విశేషం. ఇక ఈ సినిమా బుల్లితెరపై ఎప్పుడు ప్రసారమైనా ప్రేక్షకులు టీవీలకి అతుక్కుపోతుంటారు.