నొప్పి తగ్గేందుకు మందు తాగమంటే ఎన్టీఆర్ ఏం చెప్పారో తెలుసా?

ఎన్టీఆర్ కు క్రమశిక్షణ అంటే ఎంతో ఇష్టం. ఏ పని చేసినా పద్దతి ప్రకారం చేస్తారు. తొలినాళ్లలో కొన్ని చెడు వ్యసనాలకు అలవాటు పడినా.. ఆ తర్వాత వాటిని వదిలించుకున్నారు. సినిమా రంగంలోకి రాక ముందు ఆయన విజయవాడలో పొగాకు బిజినెస్ చేశారు. ఆ సమయంలో చుట్ట తాగడం బాగా అలవాటుగా మారింది. అయితే సినిమాల్లోకి వచ్చిన సమయంలోనూ ఆ అలవాటు కొనసాగించారు. ఆయన నటించిన మనదేశం సమయంలో ఆ చిత్ర దర్శకుడు ఎల్వీ ప్రసాద్ ఓ విషయం చెప్పారు.

సినిమా హీరోలకు పళ్లు తెల్లగా కనిపించాలన్నారు. అలా ఉండాలంటే చుట్ట కాల్చకూడదని చెప్పారు. ప్రసాద్ చెప్పిన మాటలు విని మళ్లీ చుట్ట జోలికి పోకూడదని ఆయన నిర్ణయం తీసుకున్నారట. దాంతో పాటు ఓ సారి ఊటీలో షూటింగ్ కు వెళ్లారట ఎన్టీఆర్. అక్కడ చలి ఎక్కువగా ఉండటంతో తెల్లవారు జామున బయటకు వచ్చి చుట్ట కాల్చారట. అదే సమయంలో తన చిన్న కొడుకు జయశంకర్ కృష్ణ అక్కడికి వచ్చి.. నాన్న మీరు చుట్ట తాగుతారా? అని అడిగాడట. దీంతో ఇక ఎప్పుడూ చుట్ట తాగకూడదని నిర్ణయం తీసుకున్నారట ఎన్టీఆర్.

అటు ఎన్టీఆర్ హీరోగా నటించిన తొలి సినిమా ‘పల్లెటూరి పిల్ల’. అందులో ఎద్దులతో పోరాట సన్నివేశం ఉంటుంది. అసలే ఆ ఎద్దు ఆస్ట్రేలియాకు చెందినది. జాగ్రత్తగా ఉండాలని డైరెక్టర్ సుబ్బారావు.. రామారావును హెచ్చరించారు. దాని కొమ్ములు పట్టుకుంటే చాలు మేం సీన్ ఓకే చేసుకుంటామని చెప్పారట. అయితే ఈ సీన్ లో నిజంగానే ఎద్దుతో పోరాడారు రామారావు. దీంతో ఆ ఎద్దు ఎన్టీఅర్ ను ఎత్తి కింద పడేసింది. ఆయన బరువంతా కుడిచేతి మీద పడింది. దీంతో ఆయనకు తీవ్రంగా నొప్పి అయ్యింది. అదే సమయంలో చిత్తూరు నాగయ్య గ్లాసులో పచ్చటి ద్రావణాన్ని తెచ్చి రామారావుకు ఇచ్చారట. ఇది తాగమని చెప్పారట. దీంతో నొప్పి తగ్గుతుందా? అని రామారావు అడిగారట. ఇది శరీర బాధలే కాదు.. మానసిక బాధలను సైతం తొలగిస్తుందనిచెప్పారట చిత్తూరు నాగయ్య.

అయితే నాగయ్య మాటలతో రామారావు నో చెప్పారు. నా చెయ్యే కాదు.. బాడీలో ఎముకలన్నీ విరిగినా.. ఈ మందు తీసుకోనన్నారట. మత్తుమందు తాగి జీవితాన్ని మరింత నొప్పిమయం చేసుకోలేను అని చెప్పారట. ఆయన మాటలకు నాగయ్య సంతోషం వ్యక్తిం చేశారట. జీవితంలో మరింత పైకి వస్తావని ఆశీర్వదించారు. వెంటనే వైద్యుడిని పిలిపించి చేతికి కట్టుకట్టించారు. మరుసటి రోజు ఆయన షూటింగ్ కు యథావిధిగా హాజరయ్యాడు.