ఎన్టీఆర్ కి క్షమాపణ చెప్పిన జీవిత రాజశేఖర్.. ఎందుకంటే?

అక్టోబర్ 10వ తేదీ మూవీ ఆర్టిస్ట్ అసోసియేషన్ ఎన్నికలు జరగనున్న నేపథ్యంలో ఎన్నికలలో పోటీ చేసే వారిలో టెన్షన్ మొదలైంది అని చెప్పవచ్చు. ఇప్పటికే మా అధ్యక్ష పదవికి పోటీ చేస్తున్న ప్రకాష్ రాజ్ -మంచు విష్ణు ప్యానెల్ సభ్యుల మధ్య తీవ్రస్థాయిలో పోటీలు ఏర్పడి పెద్దఎత్తున ఒకరిపై మరొకరు విమర్శలు చేసుకుంటున్నారు.

ఈ క్రమంలోనే ప్రకాష్ రాజ్ ప్యానెల్ లో ఉన్నటువంటి జీవితా రాజశేఖర్ మీడియా వేదికగా జూనియర్ ఎన్టీఆర్ కు క్షమాపణలు చెప్పారు. అసలు ఈమె ఎన్టీఆర్ కి క్షమాపణలు చెప్పడానికి కారణం ఏమిటనే విషయానికి వస్తే… ఇటీవలకాలంలో జీవిత రాజశేఖర్ ఎన్టీఆర్ ను కలిసినప్పుడు మా ఎన్నికలలో తమకు ఓటు వేయాలనే అడిగినప్పుడు ఎన్టీఆర్ ఏ విధంగానూ స్పందించలేదు.

ఈ క్రమంలోనే జీవిత మీడియా సమావేశంలో మాట్లాడుతూ జూనియర్ ఎన్టీఆర్ మా ఎన్నికలలో ఓటు వేయడానికి ఆసక్తి చూపడం లేదంటూ మీడియాకు తెలియజేశారు.ఈ క్రమంలోనే మంచు విష్ణు మీడియా సమావేశంలో మాట్లాడుతూ జూనియర్ ఎన్టీఆర్ తనకు మద్దతు తెలుపుతూ తనకు ఓటు వేస్తానని చెప్పినట్లు విష్ణు తెలియజేశారు.

తాజాగా జీవిత రాజశేఖర్ మీడియా సమావేశంలో భాగంగా ఎన్టీఆర్ గురించి మీడియా ఎదుట అలా చెప్పినందుకు ఎన్టీఆర్ క్షమించాలని క్షమాపణలు కోరింది. ఎన్టీఆర్ చాలా క్యాజువల్ గా చర్చించిన విషయాలను తాను అలా మీడియా ఎదుట చెప్పకుండా ఉండాల్సిందని అలా చేయడం వల్ల ఎన్నో ఇబ్బందులు వచ్చాయని, ఇలాంటి సమయంలోనే ఒకరి వ్యక్తిగత విషయాలను ఎప్పుడు ఇలా బహిర్గతం చేయకూడదనే తప్పును తెలుసుకోవటం వల్ల ఎన్టీఆర్ ను క్షమాపణ కోరుతున్నట్లు ఈ సందర్భంగా జీవిత రాజశేఖర్ తెలియజేశారు.