విజయ్ దేవకొండ కింగ్‏డమ్ సినిమాకి రివ్యూ ఇచ్చిన కేటీఆర్ కొడుకు.. విజయ్ రిప్లై వైరల్..

హైదరాబాద్: రౌడీ హీరో విజయ్ దేవరకొండ తాజా చిత్రం ‘కింగ్‌డమ్’ జూలై 31న ప్రపంచవ్యాప్తంగా భారీ అంచనాల మధ్య విడుదలైంది. గౌతమ్ తిన్ననూరి దర్శకత్వం వహించిన ఈ మాస్ యాక్షన్ డ్రామాలో భాగ్యశ్రీ బోర్సే, సత్యదేవ్ కీలక పాత్రల్లో నటించారు. రాక్ స్టార్ అనిరుధ్ రవిచందర్ అందించిన సంగీతం సినిమాకు ప్రధాన బలం అయింది. ఉదయం నుంచే పాజిటివ్ రివ్యూస్ రావడం తోపాటు, విజయ్ దేవరకొండ పవర్‌ఫుల్ పెర్ఫార్మెన్స్‌పై సోషల్ మీడియాలో ప్రశంసలు వెల్లువెత్తుతున్నాయి. చాలా కాలం తర్వాత విజయ్‌కు ఇది సాలిడ్ కంబ్యాక్ అని అభిమానులు భావిస్తున్నారు.

హిమాన్షు కొనియాడిన ‘కింగ్‌డమ్’

ఈ సినిమా చూసిన సెలబ్రిటీలలో కేటీఆర్ కొడుకు హిమాన్షు కూడా ఉన్నారు. ఆయన ట్విట్టర్ వేదికగా తన అనుభవాన్ని పంచుకున్నారు. “RTC X రోడ్స్‌లో నా ఇద్దరు స్నేహితులతో కలిసి కింగ్‌డమ్ చూశాను. థియేటర్‌లో ఉత్సాహభరితమైన వాతావరణం, బిగ్ స్క్రీన్ అనుభవం, ప్రేక్షకుల ఎనర్జీ అన్నీ కలిపి అద్భుతంగా అనిపించాయి. కింగ్‌డమ్ వైబ్ గూస్ బంప్స్ ఇచ్చింది. విజయ్ దేవరకొండ యాక్టింగ్ అద్భుతం. ఈ సినిమా నాకు చాలా నచ్చింది” అని హిమాన్షు ట్వీట్ చేశారు. ఈ ట్వీట్‌కు విజయ్ దేవరకొండ హార్ట్ ఎమోజీలతో స్పందించారు.

విజయ్ దేవరకొండ ఆనందం

అంతేకాకుండా, విజయ్ దేవరకొండ కూడా సినిమా రెస్పాన్స్‌పై ట్విట్టర్‌లో రియాక్ట్ అయ్యారు. “ప్రస్తుతం నాకు ఎలా అనిపిస్తుందో మీతో పంచుకోవాలని ఉంది. మీరు నాతో ఇలా అనుభూతి చెందాలని ఎప్పటినుంచో కోరుకున్నాను. ఆ వెంకన్న స్వామి దయ, మీ అందరి ప్రేమ… నా లాంటి వాడికి ఇంకా ఏం కావాలి!” అని ఆయన ట్వీట్ చేశారు. ప్రస్తుతం ఈ ట్వీట్ సోషల్ మీడియాలో వైరల్ అవుతోంది.

‘కింగ్‌డమ్’కు వస్తున్న పాజిటివ్ స్పందన విజయ్ దేవరకొండ కెరీర్‌కు కొత్త ఊపునిస్తుందని సినీ వర్గాలు భావిస్తున్నాయి. ఈ సినిమా బాక్సాఫీస్ వద్ద ఎలాంటి వసూళ్లను సాధిస్తుందో చూడాలి.