హైదరాబాద్ మెట్రో టైమింగ్స్‌లో భారీ మార్పు.. ఇక ఉదయం 5 నుంచే సేవలు?

హైదరాబాద్ నగర ప్రజలకు త్వరలోనే మరో సౌకర్యం అందుబాటులోకి వచ్చే సూచనలు కనిపిస్తున్నాయి. ముఖ్యంగా తెల్లవారుజామున ప్రయాణాలు చేసే వారికి ఇది పెద్ద ఊరటగా మారే అవకాశం ఉంది. నగరంలో మెట్రో సేవలను మరింత ముందుగానే ప్రారంభించే అంశంపై ప్రభుత్వం సీరియస్‌గా ఆలోచిస్తున్నట్టు సమాచారం.

ప్రస్తుతం హైదరాబాద్ మెట్రో రైళ్లు ఉదయం 6 గంటల ప్రాంతంలోనే ప్రారంభమవుతున్నాయి. అయితే దేశంలోని పలు రాష్ట్రాల నుంచి వచ్చే రైళ్లు తెల్లవారుజామునే సికింద్రాబాద్, నాంపల్లి, కాచిగూడ వంటి ప్రధాన స్టేషన్‌లకు చేరుకుంటున్నాయి. అదే సమయంలో బయల్దేరే రైళ్లు కూడా ఉన్నాయి. ఈ నేపథ్యంలో మెట్రో సర్వీసులు అందుబాటులో లేక ప్రయాణికులు ఇబ్బందులు పడుతున్నారని అధికారులు గుర్తించారు.

దీనిపై దక్షిణ మధ్య రైల్వే ఉన్నతాధికారులు రాష్ట్ర ప్రభుత్వ దృష్టికి విషయం తీసుకెళ్లినట్లు తెలుస్తోంది. తెల్లవారుజామునే నగరానికి చేరుకునే ప్రయాణికులకు మెట్రో సౌకర్యం ఉంటే రాకపోకలు సులభతరం అవుతాయని సూచించారు. ముఖ్యంగా ఉద్యోగులు, విద్యార్థులు, ఇతర రాష్ట్రాల నుంచి వచ్చే ప్రయాణికులకు ఇది ఎంతో ఉపయోగకరంగా ఉంటుందని భావిస్తున్నారు.

ఇప్పటికే నగరంలోని నాగోల్, మియాపూర్, ఎల్‌బీనగర్ వంటి టెర్మినల్ స్టేషన్‌ల నుంచి ఉదయం 6 గంటలకు మెట్రోలు ప్రారంభమవుతున్నా, ప్రధాన రైల్వే స్టేషన్‌లకు చేరుకునేలోపే సమయం గడుస్తోంది. దీంతో ముందుగా వచ్చే లేదా త్వరగా బయల్దేరే రైళ్లను అందుకోవడం కష్టమవుతోంది. ఈ సమస్యను దృష్టిలో ఉంచుకుని మెట్రో సమయాలను ముందుకు జరపాలని సూచనలు వచ్చాయి.

ఇదే అంశంపై గతంలోనూ చర్చలు జరిగినప్పటికీ సాంకేతిక కారణాలు, నిర్వహణ సమస్యల వల్ల నిర్ణయం వాయిదా పడింది. అయితే ఇప్పుడు పరిస్థితులు మారుతున్న నేపథ్యంలో మరోసారి దీనిపై సమగ్రంగా పరిశీలన జరుగుతోంది. రాష్ట్ర ఉన్నతాధికారులు కూడా దీనిపై సానుకూలంగా స్పందించినట్టు సమాచారం.

ఈ ప్రతిపాదన అమల్లోకి వస్తే నగర రవాణా వ్యవస్థలో కీలక మార్పు చోటుచేసుకునే అవకాశం ఉంది. తెల్లవారుజామునే మెట్రో సేవలు అందుబాటులోకి రావడం వల్ల రోడ్లపై ట్రాఫిక్ కూడా కొంతవరకు తగ్గే అవకాశముంది. త్వరలోనే దీనిపై స్పష్టమైన నిర్ణయం వెలువడే అవకాశం ఉందని భావిస్తున్నారు.