ప్రతినెల రూ.4 లక్షల భరణం చెల్లించాల్సిందే..! క్రికెటర్ షమీకి కోల్‌కతా హైకోర్టు షాక్‌!

టీమ్ ఇండియా పేసర్ మహ్మద్ షమీకి కోల్‌కతా హైకోర్టు భారీ షాక్ ఇచ్చింది. వ్యక్తిగత జీవితంలోని వివాదాలు కోర్టు మెట్ల వరకు వెళ్లిన నేపథ్యంలో, తాజాగా హైకోర్టు షమీపై కీలక తీర్పు వెలువరించింది. మాజీ భార్య హసిన్ జహాన్, కూతురికి నెలకు మొత్తం రూ.4 లక్షల భరణం (maintenance) ఇవ్వాలని న్యాయస్థానం స్పష్టం చేసింది.

వివాహం.. తరువాత జరిగిన పరిణామాలు
షమీ 2014లో హసిన్ జహాన్‌ను వివాహం చేసుకున్నాడు. అయితే కొద్దికాలానికే వీరి మధ్య విభేదాలు మొదలయ్యాయి. ఆ విభేదాలు తీవ్రరూపం దాల్చి, 2018లో హసిన్ జహాన్ తన భర్త షమీపై గృహహింస కేసు కూడా నమోదు చేయడం దేశవ్యాప్తంగా సంచలనం రేపింది. అప్పటి నుంచి హసిన్ జహాన్ తన కూతురితో కలిసి విడిగా జీవనం సాగిస్తున్నారు.

మొదటి తీర్పు.. ఆపై హైకోర్టుకు అప్పీల్
2023లో హసిన్ జహాన్ కోల్‌కతా జిల్లా సెషన్స్ కోర్టును ఆశ్రయించారు. అప్పట్లో కోర్టు తీర్పు ప్రకారం షమీ భార్యకు నెలకు ₹50,000, కూతురికి ₹80,000 చొప్పున మొత్తం ₹1.3 లక్షల భరణం చెల్లించాలని ఆదేశించగా… హసిన్ జహాన్ అందుతో అసంతృప్తిగా, హైకోర్టులో అప్పీల్ దాఖలు చేశారు. ఆమె తనకు నెలకు రూ.7 లక్షలు, కూతురికి రూ.3 లక్షలు మొత్తం రూ.10 లక్షలు భరణంగా ఇవ్వాలని కోర్టును కోరారు.

హైకోర్టు తాజా తీర్పు
తాజాగా కోల్‌కతా హైకోర్టు జస్టిస్ అజయ్ కుమార్ ముఖర్జీ నేతృత్వంలోని బెంచ్ ఈ విషయంలో విచారణ చేపట్టి, హసిన్ జహాన్‌కు నెలకు ₹1.5 లక్షలు, కూతురికి ₹2.5 లక్షలు చెల్లించాలని షమీకి ఆదేశాలు జారీ చేసింది. మొత్తం రూ.4 లక్షల భరణం ఇవ్వడం ద్వారా వారి ఆర్థిక అవసరాలు తీరతాయని, పిల్లల విద్య, ఇతర అవసరాలకు ఇది సరిపోతుందని న్యాయస్థానం అభిప్రాయపడింది.

కుటుంబ పరిస్థితి
హసిన్ జహాన్, షమీకి 2015లో పుట్టిన కుమార్తె ఉన్నారు. ప్రస్తుతానికి ఆమె తల్లితోనే ఉంటోంది. షమీపై విచారణలు కొనసాగుతున్నప్పటికీ, భారత్ తరఫున క్రికెట్ ఆడడంలో కొనసాగుతున్నాడు. అయితే ఈ తాజా తీర్పుతో షమీపై మరింత ఆర్థిక భారం పెరిగినట్టయింది.

ఈ పరిణామం ఇప్పుడు మీడియా వర్గాల్లో, క్రికెట్ అభిమానుల మధ్య చర్చనీయాంశంగా మారింది.