కుక్క పిల్లను కిడ్నాప్ చేసిన కోతి.. వీడియో వైరల్..

కోతులు అనేవి అడవిలోనే కాదు.. ఊళ్లల్లో కూడా గుంపులు గుంపులుగా తిరుగుతున్నాయి. దీంతో గ్రామస్తులు అనేక ఇబ్బందులకు గురవుతున్నారు. దగ్గరకు వెళ్లాలంటేనే భయంతో వణికిపోతారు జనాలు. అయితే ఓ కోతి ఇంట్లోకి చొరబడిన పెంపుడు కుక్కను కిడ్నాప్ చేసింది. అవును మీరు విన్నది నిజమే.. ఓ పెంపుడు కుక్క పిల్లను కోతి ఎత్తుకెళ్లి అందరిని ఆశ్చర్యానికి గురి చేసింది.

దీనికి సంబంధించి వీడియో ప్రస్తుతం సోషల్ మీడియాలో వైరల్ గా మారింది. వివరాల్లోకి వెళ్తే.. మలేషియాలోని ఓ ఇంట్లోకి కోతి వచ్చింది. అది ఆహార పదార్థాల కోసమే వచ్చిందని కుటుంబసభ్యులు అంతా కూడా భావించారు. కానీ ఎవరూ ఊహించని రీతిలో అది చిన్న పెంపుడు కుక్కపిల్లను చేతిలో పట్టుకొని అక్కడ నుంచి పరుగు తీసింది.

ఈ ఘటన జరిగి వారం రోజులు అవుతున్నా.. తాజాగా ఆ వీడియో వైరల్ కావడంతో వెలుగులోకి వచ్చింది. కిడ్నాప్‌నకు గురైన కుక్క పిల్లను కాపాడేందుకు కుటుంబ సభ్యులు సహా స్థానిక ప్రజలు తీవ్రంగా శ్రమించారు. కానీ అది మనిషి కాదు కదా.. అంత సింపుల్ గా తన చేతికి దొరికింది వదిలేయడానికి. ఇలా ఆ కోతి.. కుక్క పిల్లను వదిపెట్టలేదు. మూడు రోజుల పాటు తన వద్ద ఉంచుకుంటూ తిరుగుతూ ఉంది. చెట్లపైనే తిరుగుతూ.. అటు కుక్క తల్లిని, గ్రామస్తులను ముప్పు తిప్పలు పెట్టింది.

దాదాపు మూడు రోజుల తర్వాత ఆ కుక్కను దాని చెర నుంచి గ్రామస్తులు కాపాడగలిగారు. కుక్క పిల్ల కూడా సేఫ్‌గా ఉందని దాని యజమానులు తెలిపారు. ఆ కుక్క పిల్లను తన పిల్ల అనుకొని కోతి.. దానికి ఎలాంటి హాని కలిగించలేదని గ్రామస్తులు చెబుతున్నారు. ఈవీడియో సోషల్ మీడియాలో వైరల్ కాగా.. కోతి కిడ్నాప్ చేయడంపై ఆశ్చర్యం వ్యక్తం చేస్తున్నారు. వివిధ రకాలుగా కామెంట్ చేస్తున్నారు.