చక్కెరకు నో.. ఫిట్‌నెస్‌కు యెస్.. సుధీర్ బాబు హెల్త్ రూల్స్ ఇవే!

టాలీవుడ్‌లో ఫిట్‌నెస్‌కు ప్రత్యేక గుర్తింపు తెచ్చుకున్న హీరోల్లో సుధీర్ బాబు ఒకరు. నాలుగు పదుల వయసు దాటినా ఇప్పటికీ యంగ్ లుక్‌తో కనిపిస్తూ అభిమానులను ఆశ్చర్యపరుస్తుంటారు. తాజాగా ఓ ఇంటర్వ్యూలో పాల్గొన్న ఆయన తన ఫిట్‌నెస్ రహస్యాలతో పాటు రోజూ పాటించే డైట్ గురించి ఆసక్తికర విషయాలు వెల్లడించారు. కేవలం సినిమాల కోసమే కాదు, ఆరోగ్యకరమైన జీవనశైలి కోసం తాను క్రమశిక్షణతో జీవిస్తానని చెప్పారు.

సుధీర్ బాబు మాట్లాడుతూ.. చిన్నప్పటి నుంచే ఇంట్లో ఆరోగ్యకరమైన ఆహారపు అలవాట్లు నేర్పించారని తెలిపారు. తన తల్లి కారణంగానే ఫుడ్ విషయంలో నియంత్రణ, వ్యాయామంపై అవగాహన పెరిగిందన్నారు. అలాగే బ్యాడ్మింటన్ ప్లేయర్‌గా ఉన్న అనుభవం కూడా ఫిట్‌నెస్‌పై మరింత శ్రద్ధ పెట్టేలా చేసిందని పేర్కొన్నారు.

డైట్ విషయంలో తాను ఎలాంటి అతిశయోక్తులు చేయనని సుధీర్ బాబు చెప్పారు. అన్నం పూర్తిగా మానేయలేదని, కానీ చక్కెర ఉన్న పదార్థాలను మాత్రం చాలా వరకు దూరంగా పెడతానని వెల్లడించారు. ఉదయం అల్పాహారంగా ఎక్కువగా ఇడ్లీ తీసుకుంటానని, ఆయిల్ ఎక్కువగా ఉండే పదార్థాలను తగ్గిస్తానన్నారు. రోజువారీ ఆహారంలో బ్రౌన్ రైస్, చపాతీలు, కూరగాయలు, ప్రోటీన్ ఎక్కువగా ఉండే చికెన్ వంటి పదార్థాలు తప్పకుండా ఉంటాయని వివరించారు.

రోజుకు ఒకటి లేదా రెండు సార్లు ఎక్కువగా తినడం కంటే, చిన్న చిన్న మోతాదుల్లో పలుమార్లు తినడం శరీరానికి మంచిదని ఆయన అభిప్రాయపడ్డారు. అందుకే తాను రోజుకు ఆరు సార్లు ఆహారం తీసుకుంటానని చెప్పారు. శరీరానికి అవసరమైన కేలరీలు ఎంత అన్నది తెలుసుకుని, దానికి తగ్గట్టుగా తినడం వల్ల బరువు నియంత్రణలో ఉంటుందని తెలిపారు.

ఫిట్‌నెస్ అంటే కేవలం జిమ్‌కే పరిమితం కాదని, ఆహారం, నిద్ర, మానసిక ప్రశాంతత అన్నీ కలిసి ఆరోగ్యాన్ని నిర్ణయిస్తాయని సుధీర్ బాబు చెప్పారు. శరీరానికి అవసరమైన దానికంటే తక్కువ కేలరీలు తీసుకుంటే బరువు తగ్గడం సాధ్యమవుతుందని కూడా ఆయన వివరించారు. ఏది తినాలి? ఎంత తినాలి? అనే విషయాలపై సరైన అవగాహన ఉండటం చాలా ముఖ్యమన్నారు.

ఇక సినిమాల గురించి మాట్లాడుతూ.. ఇప్పుడు ప్రేక్షకుల అభిరుచులు పూర్తిగా మారిపోయాయని అన్నారు. సోషల్ మీడియా, షార్ట్ వీడియోల ప్రభావంతో ప్రేక్షకుల ఓపిక తగ్గిందని, అందుకే సినిమాల్లో ప్రతి కొద్ది నిమిషాలకు ఆకట్టుకునే ఎలిమెంట్స్ అవసరమవుతున్నాయని వ్యాఖ్యానించారు. కథ బలంగా ఉంటేనే సినిమా నిలబడుతుందని, స్టార్ ఇమేజ్ ఒక్కటే సరిపోదని సుధీర్ బాబు అభిప్రాయపడ్డారు.