Richest Hero : సౌత్ ఇండియాలోనే రిచెస్ట్ హీరో ఎవరో తెలుసా? ఆయన ఆస్తులు చూస్తే షాక్ అవుతారు!

Richest Hero : సాధారణంగా ఇండియాలో అత్యంత ధనవంతులైన సినీ సెలబ్రిటీల గురించి మాట్లాడేటప్పుడు అందరూ బాలీవుడ్ హీరోలు, హీరోయిన్ల పేర్లే చెబుతుంటారు. నిజానికి వారి సినిమాలు కూడా బాక్సాఫీస్ వద్ద భారీ కలెక్షన్లను రాబడుతుంటాయి. కానీ గత కొన్నేళ్లుగా సీన్ పూర్తిగా మారిపోయింది. తెలుగు, తమిళ, కన్నడ, మలయాళ సినిమాలు హిందీ బెల్ట్‌లో కూడా దుమ్మురేపుతున్నాయి. దీంతో మన సౌత్ హీరోలకు క్రేజ్ అమాంతం పెరిగిపోయింది. అంతేకాదు రెమ్యునరేషన్ విషయంలోనూ ఎన్నో మార్పులు చోటుచేసుకున్నాయి. అయితే ఇక్కడ ఒక ఆసక్తికరమైన విషయం ఏమిటంటే.. సినిమాలతో సంబంధం లేకుండా సౌత్ ఇండియాలో రిచెస్ట్ యాక్టర్‌గా ఎదిగిన ఒక తెలుగు హీరో ఉన్నాడు. ఆయన ఆస్తుల విలువ ఏకంగా రూ.3,572 కోట్లు. ఆ హీరో ఎవరో కాదు మన టాలీవుడ్ కింగ్ నాగార్జున.

శివ సినిమాతో తెలుగు చిత్రసీమలో ఒక సంచలనం సృష్టించి, మన్మథుడిగా యువత మనసు దోచుకున్నాడు అక్కినేని నాగార్జున. దాదాపు 70కి పైగా తెలుగు సినిమాల్లో నటించి, తన నటనతో ఎంతోమంది అభిమానుల గుండెల్లో ప్రత్యేక స్థానం సంపాదించుకున్నాడు. యంగ్ సామ్రాట్‌గా తెలుగు ప్రేక్షకుల అభిమానాన్ని పొందుతున్నాడు. ఇప్పటికీ సినిమాలు, బిగ్ బాస్ రియాలిటీ షోలతో బిజీగా ఉన్నాడంటే ఆయనకున్న క్రేజ్ ఏంటో అర్థం చేసుకోవచ్చు. అయితే నాగార్జున కేవలం సినిమాల్లోనే కాదు బిజినెస్‌లో కూడా రాణిస్తున్నాడు. ఈ క్రమంలోనే ఏకంగా రూ.3,500 కోట్లకు అధిపతిగా నిలిచి దక్షిణాదిలో రిచెస్ట్ యాక్టర్‌గా తన సత్తా చాటుతున్నాడు.

మిగతా హీరోలంతా నాగార్జున తర్వాతే.. మనీకంట్రోల్ వెబ్‌సైట్ ప్రకారం నాగార్జున నికర సంపద 410 మిలియన్ డాలర్లు. అంటే మన భారతీయ కరెన్సీలో సుమారు రూ.3,572 కోట్లు. బాలీవుడ్‌లో టాప్ స్టార్స్‌గా వెలుగొందుతున్న అమితాబ్ బచ్చన్ (రూ.3,200 కోట్లు), హృతిక్ రోషన్ (రూ.3,100 కోట్లు), సల్మాన్ ఖాన్ (రూ.2,900 కోట్లు), అక్షయ్ కుమార్ (రూ.2,700 కోట్లు), ఆమిర్ ఖాన్ (రూ.1,900 కోట్లు) వంటి వారిని కూడా నాగార్జున అధిగమించాడు. అంతేకాదు మన తెలుగు హీరోలైన చిరంజీవి (రూ.1,650 కోట్లు), రామ్‌చరణ్ (రూ.1370 కోట్లు), రజనీకాంత్ (రూ.500 కోట్లు), జూనియర్ ఎన్టీఆర్ (రూ.500 కోట్లు), ప్రభాస్ (రూ.250 కోట్లు) కూడా నాగార్జున వెనకే ఉన్నారు.

నాగార్జున సంపాదన వెనుక అసలు రహస్యం ఏమిటి? నాగార్జున ఎన్నో విజయవంతమైన సినిమాల్లో నటించాడు. ఆయన సంపాదనలో సినిమా రెమ్యునరేషన్ ఒక భాగం మాత్రమే. దీనితోపాటు వివిధ బిజినెస్ వెంచర్ల ద్వారా కూడా ఆయనకు ఆదాయం వస్తుంది. ప్రముఖ ఫిల్మ్ ప్రొడక్షన్ బ్యానర్ అయిన అన్నపూర్ణ స్టూడియోస్ (Annapurna Studios)కు నాగార్జున ఓనర్. అంతేకాదు రియల్ ఎస్టేట్, స్పోర్ట్స్ ఫ్రాంఛైజీలలో కూడా ఆయన పెట్టుబడులు పెట్టాడు. N3 Realty Enterprises అనే రియల్ ఎస్టేట్ మరియు నిర్మాణ సంస్థ కూడా ఆయనదే. కేవలం రియల్ ఎస్టేట్ ఆస్తుల విలువ సుమారు రూ.900 కోట్లు ఉంటుందని దైనిక్ భాస్కర్ రిపోర్ట్ వెల్లడించింది. నాగార్జునకు 3 స్పోర్ట్స్ ఫ్రాంఛైజీలు, ఒక ప్రైవేట్ జెట్, అర డజనుకు పైగా లగ్జరీ కార్లు కూడా ఉన్నాయి.