2022 జనవరిలో మినీ బిగ్ బాస్..హోస్ట్ గా సమంత?

తెలుగులో ఇంతవరకు చాలానే రియాల్టీ షోలు వచ్చాయి. కానీ బిగ్ బాస్ అంత హిట్ కాలేదనే చెప్పాలి. మొదటి సీజన్ నుంచి కూడా దీనికి టీఆర్పీ రేటింగ్ బాగానే వస్తోంది. ఇప్పటికే తెలుగులో ఐదో సీజన్ కూడా ముగింపు దశకు చేరుకుంది. ఇక రెండు రోజుల్లో శుభం కార్డు పనడనుంది. అయితే బిగ్ బాస్ మిస్ అవుతున్నాం అని బాధపడే వారికి ఇప్పుడు చెప్పే న్యూస్ కొద్దిగా శుభవార్తే అని చెప్పాలి.

ఎందుకంటే.. వచ్చే సంవత్సరం జనవరి నుంచి మినీ బిగ్ బాస్ షో ప్రసారం కానుందంట. ఇక్కడ ట్విస్ట్ ఏంటంటే.. అది టెలివిజన్లో కాకుండా.. ఓటీటీలో ప్రారంభించనున్నారనేది తెలుస్తోంది. అవును మీరు విన్నది నిజమే.. బిగ్ బాస్ తెలుగు ఓటీటీలో జనవరి 2022లో ప్రారంభించబడే అవకాశం ఉంది. సోషల్ మీడియాలో హల్ చల్ చేస్తున్న కొన్ని వార్తలు ఇదే విషయాన్ని చెబుతున్నాయి.

బిగ్ బాస్ ఓటీటీని నెట్‌ఫ్లిక్స్ లేదా ఆహాలో ప్రీమియర్ అవుతుందనేది సమాచారం. ఇక బిగ్ బాస్ తెలుగు ఓటీటీని ఎవరు హోస్ట్ చేస్తారనే దానిపై చాలా ఊహాగానాలు ఉన్నాయి. బిగ్ బాస్ ఓటీటీలోకి కొత్త హోస్ట్‌ని ఎంపిక చేయాలని షో నిర్వాహకులు ప్లాన్ చేస్తున్నారని వినికిడి. స్టార్ మాలో ప్రసారం అవుతున్న ప్రస్తుత షోకి నాగార్జున హోస్ట్ కాగా.. దీనికి మాత్రం కొత్తవాళ్లను తీసుకోవాలనే ఆలోచన ఉన్నట్లు తెలుస్తోంది. బిగ్ బాస్ ఓటీటీ హిందీ వెర్షన్‌లో కూడా అసలు సీజన్ ప్రారంభానికి ముందు షోను హోస్ట్ చేసింది సల్మాన్ ఖాన్ కాదు కరణ్ జోహార్ అనే విషయం అందరికీ తెలిసిందే. దీని ద్వారానే కొత్తగా తెలుగులో కూడా ఓటీటీ బిగ్ బాస్ తీసుకువచ్చేందుకు ప్రయత్నిస్తున్నారు.

ప్రస్తుతం పలువురు టాలీవుడ్ నటీనటులు ఆహా, టీవీ ఛానళ్లలో సెలబ్రిటీల టాక్ షోలను నిర్వహిస్తున్న సంగతి తెలిసిందే. ఇటీవల, జూనియర్ ఎన్టీఆర్ జెమినీ టీవీలో హోస్ట్ చేస్తున్న తన గేమ్ షో ‘EMK’ని ముగించాడు. ఆహాలో ప్రసారమయ్యే సెలబ్రిటీ టాక్ షో ‘అన్‌స్టాపబుల్’తో బాలకృష్ణ బిజీగా ఉన్నారు. బిగ్ బాస్ 4 సమయంలో ఓ రోజు నాగార్జున అందుబాటులో లేని పక్షంలో సమంత వారాంతపు హోస్ట్ గా చేపట్టిన సంగతి తెలిసిందే. ప్రస్తుతం బిగ్ బాస్ ఓటీటీకి సమంతా కొత్త హోస్ట్ కావచ్చని పుకార్లు షికార్లు చేస్తున్నాయి. అయితే దీనిపై మేకర్స్ నుంచి ఎలాంటి సమాచారం రాలేదు.