Senior actor Jhansi : సావిత్రి గారు చనిపోయే ముందు డబ్బులు లేక జెమినీ గణేశన్ పేపర్ లో యాడ్ ఇచ్చారు… అది చూసి చాలా బాధపడ్డా…: సీనియర్ యాక్టర్ ఝాన్సీ

Senior actor Jhansi : ఎన్నో సినిమాల్లో క్యారెక్టర్ ఆర్టిస్ట్ గా అలరించిన అలనాటి నటి ఝాన్సీ. బాపు గారి సినిమాల్లో ఎక్కువగా కనిపించిన ఝాన్సీ గారు తల్లి పాత్రలతో ఎక్కువగా మెప్పించారు. ఎక్కువగా ఎన్టీఆర్ గారితోనూ, ఏఎన్ఆర్ తోనూ అప్పటి అగ్ర హీరోలందరితోనూ ఎన్నో సినీమాల్లో నటించిన ఆమె ఈ తరం వారికి గుర్తు రావాలంటే మాత్రం మనవూరి పాండవులు, పెళ్లి పుస్తకం, శంకరాభరణం వంటి సినిమాల్లో నటించిన ఝాన్సీ గారిని చూడవచ్చు. ఎన్నో సినిమాల్లో నటించి ఆర్థికంగా బాగా సంపాదించుకున్నా నేడు ఒక చిన్నగదిలో కాలం వెళ్ళదీస్తున్నారు ఝాన్సీ. అప్పట్లో అగ్ర నటులతో పనిచేసిన ఝాన్సీ గారు అప్పటి అనుభవాలను పంచుకున్నారు.

సావిత్రి గారి విషయంలో బాధపడ్డాను…

ఎన్టీఆర్, ఏఎన్ఆర్, కృష్ణ, శోభన్ బాబు, కృష్ణం రాజు ఇలా అందరు నటులతో పనిచేసిన ఝాన్సీ గారు చిన్నవయసులోనే తల్లి పాత్రలను వేశారు. సావిత్రి గారు, కే ఆర్ విజయ, భానుమతి వంటి వారితో పనిచేసిన ఆమె తాజా ఇంటర్వ్యూలో అప్పటి విషయాలను పంచుకున్నారు. ఎక్కువగా ఎవరితోనూ స్నేహం చేయని ఝాన్సీ గారు కేవలం సావిత్రి గారు, విజయ గారితో ఎక్కువగా మాట్లాడేదాన్ని అంటూ చెప్పారు. విజయ గారి ఇల్లు పక్కనే ఉండటం వల్ల తరచూ కలుసుకునేవాళ్ళమని చెప్పారు.

ఇక సావిత్రి గారి ఇంటికి వెళ్తూ అప్పుడప్పుడు కలిసేవాళ్ళమని, ఆవిడ దానధర్మలు ఎక్కువగా చేసేవారంటూ తెలిపారు. ఇక సావిత్రి గారికి ఆరోగ్యం బాగోలేక కోమాలో ఉన్నపుడు ఆవిడను చూడటానికి వెళ్లలేకపోయానని చెప్పారు ఝాన్సీ. ఆ సమయంలో సావిత్రి గారి భర్త జెమినీ గణేశన్ గారు వార్త పత్రికలో సావిత్రి గారి చికిత్స కోసం ఎవరైనా డబ్బు సహాయం చేయండంటూ ప్రకటన ఇచ్చారు. ఆ ప్రకటన చూసి చాలా బాధపడ్డాను, ఎలా బ్రతికిన ఆమె ఎలా అయ్యారు చివరికి అనుకుని ఆమె జీవితం అందరికీ ఒక గుణపాఠం అంటూ ఝాన్సీ అభిప్రాయపడ్డారు.