అఖండ నుంచి ఆర్ఆర్ఆర్ వరకు అన్నీ బ్లాక్ బస్టర్స్ ‘స్టార్ మా’వే?

ప్రస్తుతం తెలుగు బుల్లితెరపై ముందంజలో ఉన్న చానల్స్ ఏవైనా ఉన్నాయా అంటే అందులో ముందు వరుసలో స్టార్ మా తప్పనిసరిగా ఉంటుంది. స్టార్ మా, ఈ టీవీ, జీతెలుగు మధ్య ఎప్పుడు గట్టి పోటీనే ఉంటుంది. ఇక సినిమాల విషయంలో అయితే ప్రత్యేకంగా చెప్పాల్సిన పనిలేదు. సినిమా సాటిలైట్ లను కొనుగోలు చేసే విషయంలో స్టార్ మా, జీ తెలుగు భారీగా పోటీ పడతాయనే విషయం ప్రత్యేకంగా చెప్పనక్కర్లేదు.

ప్రస్తుతం టాలీవుడ్ ఇండస్ట్రీలో వరుస సినిమాలు విడుదలకు సిద్ధం కాబోతున్నాయి. ఈ క్రమంలోనే స్టార్ పలు సినిమా శాటిలైట్ లను సొంతం చేసుకుందని చెప్పవచ్చు. తాజాగా స్టార్ మా కొనుగోలు చేసిన సినిమాలు వాటి వివరాలను విడుదల చేశారు. స్టార్ మా కొనుగోలు చేసిన శాటిలైట్ లో పాన్ ఇండియా చిత్రాలు కూడా ఉండడం విశేషం.

ఇందులో రాజమౌళి ఆర్ఆర్ఆర్, సుకుమార్ పుష్ప చిత్రాలు కూడా ఉన్నాయి. అదేవిధంగా బాలకృష్ణ అఖండ, నాని టక్ జగదీష్, రవితేజ ఖిలాడి, మహేష్ బాబు సర్కారీ వారి పాట, నాగచైతన్య లవ్ స్టోరీ వంటి సినిమాలను స్టార్ మా దక్కించుకుంది. అయితే ఈ సినిమాలలో కేవలం టక్ జగదీష్ , లవ్ స్టోరీ సినిమాలు మాత్రమే విడుదలకు సిద్ధంగా ఉన్నాయి. మరికొన్ని సినిమాలు షూటింగ్ చివరి దశలో ఉన్నాయి. అంటే ఈ సినిమాలు షూటింగ్ పూర్తి చేసుకుని విడుదల అయ్యి బుల్లితెరపై ప్రసారం కావాలంటే మరికొంత సమయం పడుతుందని చెప్పవచ్చు. ఈ సినిమాలు థియేటర్లో ఏవిధంగా రికార్డులను సృష్టిస్తాయో వేచి చూడాలి.