నాగచైతన్య, సమంత మధ్య గత కొన్ని రోజుల నుంచి విడాకులకు సంబంధించి వార్తలు వైరల్ గా మారాయి. ప్రతీ రోజు ఏదో ఒక వార్త సోషల్ మీడియాలో హల్ చల్ చేస్తూ ఉండేది. వారి కాపురంలో ఏర్పడ్డ విభేదాలు తారాస్థాయికి చేరాయని.. అందుకనే ఎన్ని వార్తలు వచ్చిన పట్టించుకోవడం లేదంటూ కూడా సోషల్ మీడియాలో రూమర్లు వైరల్ అయ్యాయి.

అయితే ఈ వార్తలపై ఎట్టకేలకు నాగచైతన్య స్పందించారు. రేపు అనగా సెప్టెంబర్ 24 న ‘లవ్ స్టోరీ’ విడుదల సందర్భంగా అతడు ప్రమోషన్ కార్యక్రమంలో పాల్గొన్నారు. దీనిలో అతడు మీడియాతో మాట్లాడారు. తన పేరుపై వస్తున్న పుకార్లు చూసి మొదట్లో చాలా బాధపడ్డానని.. ఒకరిని ఇబ్బందులకు గురి చేసి ఇలాంటి వార్తలు ఎలా రాస్తారనే ఆవేదనకు గురయ్యానని పేర్కొన్నాడు.

మొదట్లో మాస పత్రికల్లో సినిమాల గురించి ఎక్కువగా వచ్చేవని.. అప్పుడు అందులో వచ్చింది నెల రోజులు ఉండేదని.. దానినే ఎక్కువగా నమ్మేవారని చెప్పాడు. కానీ ప్రస్తుతం అలా లేదని.. ఒక వార్త ప్రచురితమైన వెంటనే దాని గురించి మళ్లీ క్షణ్ణంగా తెలుసుకొని మళ్లీ.. వేరే దానిని రాసేస్తున్నారని పేర్కొన్నాడు. దీంతో ప్రజలు ఏ వార్త నమ్మాలో అర్థం గాక ఇబ్బందులకు గురవుతున్నారని.. అయినా ప్రజలు కేవలం నిజం మాత్రం నమ్ముతారనే విషయం అర్థం అయిందంటూ చెప్పుకొచ్చాడు. ఇలా పిచ్చి పిచ్చి రాతలకు స్పందించడం ఎప్పుడో మర్చిపోయానని చెప్పాడు.

ఇక్కడ బాధాకరం ఏంటంటే.. గాసిప్స్ కోసం తన పేరును వాడుకోవడం కరెక్ట్ గా లేదని.. ఇది చాలా బాధను కలిగిస్తుందన్నారు. ఏ వ్యక్తికైనా వృత్తిపరమైన జీవితం, వ్యక్తిగత జీవితం అనేవి రెండు ఉంటాయని.. ఆ రెండింటిని విడివిడిగా చూడటం తన తల్లిదండ్రులను చూసి నేర్చుకున్నట్లు తెలిపాడు. వృత్తిపరమైన పనులు ముగించుకొని ఇంటికి వచ్చిన తన తల్లిదండ్రులు ఏనాడు వాటి గురించి మాట్లాడుకోలేదని.. తాను కూడా వాళ్ల నుంచి అదే నేర్చుకున్నట్లు స్పష్టం చేశాడు.