ఆ డైరెక్టర్, ప్రొడ్యూసర్ ఫొటోషూట్‌ కోసం పిలిచి నన్ను మోసం చేశారు : నటి జయవాణి

ఒక మూవీ అని చెప్పి ఫోన్ చేశారు. వాళ్లేం చెప్పారంటే ఒకప్పుడు రమాప్రభ గారు ప్రేమ్‌నగర్ లాంటి సినిమాల్లో వేసుకున్నారు కదా ఆ డ్రెస్ వేసుకోవాలని చెప్పినట్టు ప్రముఖ ఆర్టిస్ట్ జయవాణి తెలిపారు. అయితే ఆ క్యారెక్టర్ తనకు సెట్ అవుతుందా లేదా చూద్దామని ఆ డైరెక్టర్ తనతో అన్నారని ఆమె చెప్పారు. అక్కడున్న వాళ్లలో తనకు ఎవరూ తెలియదని, డైరెక్టర్‌తో పాటు ప్రొడ్యూసర్ కూడా కొత్తవాళ్లని ఆమె చెప్పుకొచ్చారు.

ఆ తర్వాత ఆ సినిమాకు సంబంధించి ఒక ఫొటోషూట్ చేద్దామని అన్నారని జయవాణి చెప్పారు. కానీ ఆ పాత్రలో ఎలాంటి డ్రెస్ వేసుకోవాలి. అసలు అది ఎలా ఉంటుందో తనకు తెలియదు కాబట్టి ఓకే చెప్పానని ఆమె అన్నారు. అది ఎలా ఉందంటే లంబాడీ డ్రెస్ టైప్ ఉందని తనకు తర్వాత తెలిసిందని ఆమె చెప్పారు. అది వేసుకొని ఫొటోషూట్ తీసుకున్నారని ఆమె వివరించారు. అలా ఫొటోలు తీస్తున్న సమయంలో ఒక నాలుగు ఫొటోలు సరిపోతాయి కదండీ అని తను అంటే, లేదమ్మా ఫొటోషూట్ కదా అని తనకు ఏదో నచ్చజెప్పారని ఆమె తెలిపారు. అలా ఆ రోజు ఫొటోషూట్ అని చెప్పి తన ఫొటోలు తీసుకున్నారని ఆమె అన్నారు.

ఇకపోతే ఆ తర్వాత ఆ ఆఫీస్ ఏమైందో తెలియదు. ప్రొడ్యూసర్ ఏమయ్యారో, డైరెక్టర్ ఏమయ్యారో తనకు తెలియలేదని జయవాణి అన్నారు. కానీ తన ఫొటోస్ అన్నీ మాత్రం వెబ్‌సైట్‌లో వచ్చేశాయని ఆమె చెప్పారు. అవి ఎలా వచ్చాయి? వాటిని ఎలా తీసేయాలి ? ఎవరిని అడగాలని కూడా తనకు తెలియలేదని ఆమె అన్నారు. అక్కడ ఫొటోస్ తీసిన ఫొటోగ్రాఫర్‌ నెంబర్ గానీ, ఇంకెవరి డిటేల్స్ కూడా తాను తీసుకోలేదని ఆమె చెప్పారు. అవి ఎవరు పెట్టారో తనకు ఇప్పటికీ తెలియదని, కానీ ఇప్పటికీ అదొక మచ్చలాగా తనతో ట్రావెల్ అవుతూనే ఉన్నాయని ఆమె ఆవేదన వ్యక్తం చేశారు.