వేసవిలో బెస్ట్ కూర ఇదే.. శరీరానికి చల్లదనం, రుచికి అదిరిపోయే టేస్ట్!

ఇంటి వంటల్లో రుచితో పాటు ఆరోగ్యం కూడా కలగాలంటే సీజనల్ కూరగాయలతో తయారయ్యే వంటకాలకు ప్రాధాన్యం ఇవ్వాలని పోషకాహార నిపుణులు సూచిస్తున్నారు. అలాంటి వంటల్లో ఒకటిగా నిలుస్తోంది Ridge Gourd (బీరకాయ)తో చేసే జీడిపప్పు కూర. సింపుల్ పదార్థాలతో తక్కువ సమయంలో తయారయ్యే ఈ వంటకం రుచితో పాటు శరీరానికి అవసరమైన పోషకాలను కూడా అందిస్తుంది.

ఈ కూరకు ప్రధానంగా బీరకాయ ముక్కలు, పచ్చి జీడిపప్పు, ఉల్లిపాయ, టమోటా, పచ్చిమిర్చి వంటి సాధారణ పదార్థాలే సరిపోతాయి. మొదట కడాయిలో నూనె వేసి వేడి అయిన తర్వాత ఆవాలు, జీలకర్రతో తాలింపు చేయాలి. ఆపై కరివేపాకు, ఉల్లిపాయ ముక్కలు, పచ్చిమిర్చి వేసి స్వల్పంగా వేయించాలి. తర్వాత అల్లం వెల్లుల్లి పేస్ట్ వేసి వాసన పోయే వరకు కలుపుతూ ఉండాలి.

దీని తరువాత టమోటా ముక్కలు జత చేసి మెత్తగా అయ్యే వరకు ఉడికించాలి. తరువాత పసుపు, కారం, ధనియాల పొడి, జీలకర్ర పొడి వేసి మిశ్రమాన్ని బాగా కలపాలి. ఇప్పుడు బీరకాయ ముక్కలు, జీడిపప్పు వేసి తక్కువ నీటితో మూత పెట్టి మద్యమ మంటపై మగ్గించాలి. బీరకాయలో సహజంగా నీరు ఎక్కువగా ఉండటం వల్ల అదనంగా నీరు ఎక్కువగా అవసరం ఉండదు.

సుమారు 15–20 నిమిషాల తర్వాత బీరకాయ మెత్తగా అయ్యి, జీడిపప్పు కూడా మృదువుగా మారుతుంది. చివరగా ఉప్పు సర్దుకుని కొత్తిమీర జత చేస్తే కూర సిద్ధం అవుతుంది. ఈ వంటకం చపాతీ, రైస్ రెండింటికీ సరిపోతుంది.

పోషక విలువల పరంగా చూస్తే, జీడిపప్పులో ప్రోటీన్, ఆరోగ్యకరమైన కొవ్వులు ఎక్కువగా ఉంటాయి. బీరకాయ శరీరాన్ని చల్లగా ఉంచడంలో సహాయపడుతుందని, జీర్ణ సమస్యలు తగ్గించడంలో ఉపయోగపడుతుందని నిపుణులు చెబుతున్నారు. వేసవికాలంలో ఈ కూరను డైట్‌లో చేర్చుకోవడం వల్ల శరీరానికి తేలికగా ఉంటుంది.

మొత్తానికి, తక్కువ పదార్థాలతో, తక్కువ సమయంలో తయారయ్యే ఈ బీరకాయ-జీడిపప్పు కూర రుచితో పాటు ఆరోగ్యాన్ని కూడా అందించే మంచి ఎంపికగా చెప్పొచ్చు. ఇంట్లో అందరికీ నచ్చే ఈ రెసిపీని ఒకసారి ట్రై చేస్తే మళ్లీ మళ్లీ చేయాలనిపించే అవకాశం ఉంది.