పెద్దలు చెప్పిన మాట వెనుక శాస్త్రం ఇదే.. రాత్రిళ్లు పుల్లటి ఫుడ్ ఎందుకు వద్దంటే?

రాత్రిపూట పుల్లని ఆహారాలు తినొద్దని పెద్దలు తరచూ చెబుతుంటారు. చాలామంది దీనిని సాధారణ సూచనగా తీసుకున్నా, ఆరోగ్య నిపుణులు మాత్రం దీని వెనుక శాస్త్రీయ కారణాలు ఉన్నాయని చెబుతున్నారు. ముఖ్యంగా నిద్రకు ముందు పుల్లటి పదార్థాలు ఎక్కువగా తీసుకోవడం వల్ల జీర్ణవ్యవస్థపై ప్రతికూల ప్రభావం పడే అవకాశం ఉందని హెచ్చరిస్తున్నారు.

పుల్లని ఆహారాల్లో సహజంగా ఆమ్ల గుణాలు ఎక్కువగా ఉంటాయి. రాత్రిపూట శరీర జీవక్రియ వేగం తగ్గిపోతుంది కాబట్టి, ఈ ఆహారాలు సరిగ్గా జీర్ణం కాకపోవచ్చు. దీంతో గుండెల్లో మంట, ఎసిడిటీ, యాసిడ్ రిఫ్లక్స్ వంటి సమస్యలు వచ్చే అవకాశం ఉందని వైద్యులు చెబుతున్నారు. ముఖ్యంగా భోజనం చేసిన వెంటనే నిద్రపోతే ఈ సమస్యలు మరింత పెరగొచ్చు.

వేసవికాలంలో పచ్చిమామిడి, ఊరగాయలు, వెనిగర్ ఆధారిత ఆహారాలు రాత్రిళ్లు తినడం చాలామందికి అలవాటుగా ఉంటుంది. అయితే ఇవి శరీరంలో కఫం ఉత్పత్తిని పెంచే అవకాశం ఉందని ఆయుర్వేద నిపుణులు సూచిస్తున్నారు. ఫలితంగా ఉదయాన్నే గొంతు ఇబ్బంది, ముక్కు దిబ్బడ, దగ్గు, అలసట వంటి సమస్యలు ఎదురయ్యే అవకాశముంది.

బరువు తగ్గేందుకు డైట్ ఫాలో అవుతున్నవారు కూడా రాత్రిపూట పుల్లటి పదార్థాలను తగ్గించడం మంచిదని పోషకాహార నిపుణులు చెబుతున్నారు. కొన్ని పుల్లని ఆహారాలు శరీరంలో నీటిని నిల్వచేసే అవకాశం ఉండటంతో ఉబ్బరం లేదా బరువు పెరుగుదల సమస్యలు రావచ్చని పేర్కొంటున్నారు.

మంచి నిద్ర కోసం రాత్రి భోజనం తేలికగా ఉండాలని వైద్యులు సూచిస్తున్నారు. పడుకునే ముందు కనీసం రెండు నుంచి మూడు గంటల వ్యవధి ఉండేలా చూసుకోవాలని అంటున్నారు. పుల్లని ఆహారం తినాలనిపిస్తే మధ్యాహ్న సమయంలో తీసుకోవడం శరీరానికి అనుకూలమని నిపుణులు చెబుతున్నారు. సరైన ఆహార అలవాట్లు పాటిస్తే జీర్ణవ్యవస్థతో పాటు మొత్తం ఆరోగ్యం మెరుగుపడే అవకాశం ఉంటుందని సూచిస్తున్నారు.