వేసవిలో చలువ కోసం సూపర్ ఫుడ్ ఇదే.. ప్రోబయోటిక్ పవర్.. చద్దన్నం తింటే లాభాలే!

వేసవి తీవ్రత పెరుగుతున్న ఈ రోజుల్లో శరీరాన్ని చల్లబరచే ఆహారాలపై ప్రజలు దృష్టి పెడుతున్నారు. అలాంటి వాటిలో సంప్రదాయమైన చద్దన్నం ప్రత్యేక స్థానం సంపాదించుకుంది. మిగిలిన అన్నంతో సులభంగా తయారయ్యే ఈ పులియబెట్టిన పెరుగు అన్నం శరీరానికి చలువనిచ్చే గుణాలు కలిగి ఉంటుంది. ఉదయాన్నే భారమైన టిఫిన్ తినలేని సమయంలో ఇది తేలికగా జీర్ణమై శరీరానికి శక్తిని అందిస్తుంది.

వైద్య నిపుణుల అభిప్రాయం ప్రకారం, చద్దన్నం ప్రోబయోటిక్ లక్షణాలు కలిగిన ఆహారం. ఇందులో ఉండే మంచి బ్యాక్టీరియా జీర్ణవ్యవస్థను మెరుగుపరచడంలో కీలక పాత్ర పోషిస్తుంది. వేసవిలో డీహైడ్రేషన్ సమస్యను తగ్గించడంలో కూడా ఇది సహాయపడుతుంది. ముఖ్యంగా మట్టిపాత్రలో తోడు పెట్టిన చద్దన్నం మరింత రుచిగా ఉండటంతో పాటు, సహజంగా చల్లదనాన్ని నిలుపుకుంటుంది.

ఇది తయారు చేసే విధానం కూడా చాలా సులభం. రాత్రి మిగిలిన అన్నంలో పాలు, కొద్దిగా నీరు, పెరుగు కలిపి మూతపెట్టి ఉంచితే ఉదయానికి పులియబెట్టిన అన్నం సిద్ధమవుతుంది. తరువాత ఉప్పు కలిపి ఉల్లిపాయ, పచ్చిమిర్చి లేదా ఊరగాయతో తీసుకుంటే మరింత రుచిగా ఉంటుంది. బ్రౌన్ రైస్‌తో కూడా ఈ వంటకం తయారు చేసుకోవచ్చు.

ఆహారంలో చిన్న మార్పులతో పెద్ద ప్రయోజనాలు పొందవచ్చని నిపుణులు చెబుతున్నారు. వారానికి ఒకసారి అయినా టిఫిన్ బదులు చద్దన్నం తీసుకోవడం ద్వారా శరీరానికి తేలికపాటి పోషణతో పాటు చల్లదనం లభిస్తుంది. సంప్రదాయ ఆహారాలను తిరిగి ఆహారపు అలవాట్లలో చేర్చుకోవడం ఆరోగ్యానికి మేలు చేస్తుందని వైద్యులు సూచిస్తున్నారు.