బ్యాచిల‌ర్ లైఫ్‌కి గుడ్ బై చెప్పేయబోతున్న టాలీవుడ్ యంగ్ హీరో శర్వానంద్

టాలీవుడ్‌ లో క‌రోనా లాక్ డౌన్ స‌మ‌యంలోనే వ‌రుసగా పెళ్లిళ్లు జరిగి పోయాయి. యంగ్ హీరోల దగ్గర్నుంచి టాలీవుడ్ ద‌ర్శ‌కుల వరకూ అందరూ పెళ్లి బాట ప‌ట్టడం విశేషంగా చెప్పవచ్చు. ప్రముఖ సినీ నిర్మాత దిల్ రాజు రెండో పెళ్లి దగ్గర్నుంచి మొదలైన ఈ పెళ్ళిళ్ళ హంగామా నిఖిల్‌, నితిన్‌, రానా, ద‌ర్శ‌కుడు సుజిత్ వరకూ కొనసాగింది. సందట్లో సడేమియా అన్నట్లుగా త్వ‌ర‌లోనే మెగా డాట‌ర్ కొణిదెల నిహారిక పెళ్ళి కూడా జ‌ర‌గి పోతుంది. అయితే.. వీళ్ళందరి బాటలో పయనించాలని స్ట్రాంగ్ గా ఫిక్సైన యంగ్ హీరో శ‌ర్వానంద్ కూడా త‌న బ్యాచిల‌ర్ లైఫ్‌కి గుడ్ బై చెప్పేయబోతున్నాడు. మెగా హీరో రామ్‌ చ‌ర‌ణ్ స్టైల్ లోనే త‌న బాల్య స్నేహితురాలిని శ‌ర్వానంద్ పెళ్లి చేసుకోబోతున్నాడని తాజా సమాచారం.

వివరాల్లోకి వెళ్తే.. తెలుగులో విభిన్నమైన చిత్రాలలో నటిస్తూ.. తనకంటూ ఒక ప్రత్యేకమైన గుర్తింపును సంపాదించుకున్న యంగ్ హీరో శర్వానంద్ తన కెరీర్ ప్రారంభం నుంచి తానెంచుకునే కథలు, పాత్రలు చాలా భిన్నంగా వున్నాయనే చెప్పవచ్చు. 1984లో విజయవాడలో పుట్టిన శర్వానంద్ మొదటి సారిగా మెగాస్టార్ చిరంజీవితో కలిసి ‘థమ్సప్ యాడ్’ లో కన్పించాడు. ఆ తర్వాత నటుడిగా 2003 లో ‘ఐదోవ తారీఖు’ అనే చిత్రంతో టాలీవుడ్ ఎంట్రీ ఇచ్చిన శర్వానంద్ ఆ తర్వాత శంకర్ దాదా MBBS, సంక్రాంతి, లక్ష్మీ వంటి చిత్రాల్లో కొన్ని విభిన్నమైన పాత్రలలో నటించాడు. హీరోగా శర్వానంద్ కు లైఫ్ ఇచ్చింది మాత్రం క్రిష్ దర్శకత్వంలో వచ్చిన ‘గమ్యం’ చిత్రమేనని చెప్పవచ్చు. ఈ చిత్రం తర్వాత ‘అందరి బంధువయ’ చిత్రంతో నటుడిగా మెప్పించిన శర్వానంద్.. ‘ప్రస్థానం’ లాంటి క్లాసిక్ మూవీతో పరిపూర్ణ నటుడిగా మారి పోయాడు. సుజీత్ దర్శకత్వంలో వచ్చిన ‘రన్ రాజా రన్’ చిత్రంతో హిలేరియస్ హిట్ కొట్టిన శర్వానంద్ తన సినిమా కెరీర్ లో మళ్లీ మళ్లీ ఇది రాని రోజు, ఎక్స్ ప్రెస్ రాజా, శతమానం భవతి వంటి హిట్లను సాధించాడు.

పోయిన సంవత్సరం ‘రణరంగం’ చిత్రంతో నిరాశ పర్చిన శర్వానంద్ కి ఈ ఏడాది ప్రథమార్థంలో విడుదలైన ‘జాను’ చిత్రం కూడా పెద్దగా సక్సెస్ నివ్వలేకపోయింది. తను నటించిన సినిమాలు హిట్టైనా.. కాకపోయినా ప్రతి చిత్రంలోనూ నటుడిగా తనని తాను నిరూపించుకుంటున్నాడు శర్వానంద్. ఇండ‌స్ట్రీలో సుమారు 16 ఏళ్లుగా సినిమాలలో నటిస్తున్న శర్వానంద్ ప్రస్తుత వ‌య‌స్సు 36. తాజాగా తన బాల్య స్నేహితురాల‌ని పెళ్ళి చేసుకునేందుకు సిద్ధ‌మైనట్లు సోషల్ మీడియాలో రూమర్స్ షికార్లు చేయడంతో.. శర్వానంద్ ను పరిణయమాడబోయే ఆ అమ్మాయి ఎవరు.? అనే ఆసక్తి శర్వానంద్ ఫ్యాన్స్ లో మొదలైంది.

ఆమె మ‌రెవ‌రో కాదు.. ఓ మ‌హిళా పారిశ్రామిక‌వేత్త‌ అని, శర్వానంద్ బాల్య స్నేహితురాలని, ఈమధ్యనే ఆమె బిజినెస్‌లో బాగానే సెటిలైందని, యువ మహిళా వ్యాపారవేత్తగా కూడా ఆమె మంచి పేరును సంపాదించుకుందని ఫిలిమ్ నగర్ టాక్.. గత కొన్నేళ్లుగా ప్రేమ‌లో ఉన్న వీరిద్దరి పెళ్ళికి ఇరు కుటుంబాల పెద్ధ‌లు కూడా ఓకె చెప్పేయడంతో మంచి ముహూర్తం చూసి వీళ్ళిద్దరూ ఒక్క‌ట‌య్యేందుకు సిద్ధమౌతున్న‌ట్లుగా తెలిసింది. త్వ‌ర‌లోనే వీళ్ళిద్దరి నిశ్చితార్థానికి ఏర్పాట్లు చేస్తున్న‌ట్టు కూడా వార్త‌లు వినిపిస్తున్నాయి. శ‌ర్వానంద్ ప్ర‌స్తుతం శ్రీ‌కారం చిత్రంలో న‌టిస్తున్నారు. ఈ చిత్రంతో పాటు మ‌హా స‌ముద్రం, యువీలో ఓ మూవీ, ఏషియ‌న్ ఫిలింస్‌లో మ‌రో మూవీలోనూ నటించబోతున్నాడు శర్వానంద్. ఇక శర్వానంద్ పెళ్లి వార్త‌ల్లో నిజ‌మెంత వుందో తెలియాలంటే స్వ‌యంగా శ‌ర్వానంద్ ప్ర‌క‌టించేంత వ‌ర‌కు వేచి చూడాల్సిందే.!