Actor Samuthirakani : తెలుగులో అల్లు అర్జున్ నటించిన అలా వైకుంఠపురం సినిమా ఎంత పెద్ద హిట్ అయిందో ప్రత్యేకంగా చెప్పాల్సిన అవసరం లేదు. అందులోని ప్రతీ సాంగ్ ప్రతి ఒక్కరినీ ఆకట్టుకున్నాయి. ఈ సినిమాలో విలన్ గా నటించిన ‘సముద్రఖని’ తమిళ ఇండస్ట్రీలో సుపరిచితుడు. ఇటీవలే రాజమౌళీ దర్శకత్వంలో వచ్చిన ఆర్ఆర్ఆర్ సినిమాలో కూడా అయన అద్భుతమైన పాత్ర పోషించారు. అంతే కాదు మహేష్ బాబు నటించిన సర్కారు వారి పాట, పవన్ కళ్యాణ్ భీమ్లా నాయక లాంటి సినిమాలలో కీలకమైన పాత్రలో నటించి తెలుగు ప్రేక్షకులకు మరింత దగ్గరయ్యారు. అయితే అతడు ఇండస్ట్రీలోకి వచ్చే ముందు ఎన్నో కష్టాలను ఎదుర్కొన్నట్లు ఓ ఇంటర్వ్యూలో చెప్పుకొచ్చాడు. ఓ ఘటన గురించి ఆయన చెప్పుతూ.. భావోద్వేగానికి గురయ్యారు.

అసలేం జరిగిందంటే.. మొదట అతడు సినిమాలో అవకాశాల కోసం చెన్నై వెళ్లాడట. అక్కడ అతడు ఓ రూంలో ఉండి సినిమాలో అవకాశం కోసం ప్రయత్నాలు మొదలు పెట్టారు. ఓ రోజు అతడు ప్రయత్నంలో భాగంగా బయటకు వెళ్లాల్సి వచ్చింది. అతడు ఆ సమయంలో కనీసం చెప్పులు కొనుగోలు చేసేందుకు డబ్బులు లేకుండా ఉన్నాడు. అలా అతడు బయటకు వెళ్లే సమయంలో తన రూంలో ఉన్న స్నేహితుడి చెప్పులు వేసుకునేందుకు ప్రయత్నించగా.. దానికి సదరు వ్యక్తి ఒప్పుకోలేదు.

దీంతో ఎంతో భాదపడిన అతడు ఒట్టి కాళ్లతోనే నడుచుకుంటూ వెళ్లాడు. వెళ్లే మార్గంలోనే అతడు ఆ అవమానాన్ని తట్టుకోలేక చనిపోవాలని అనుకున్నారట. ఇలా అతడు వెళ్తున్న క్రమంలో ఓ వ్యక్తి అతడికి లిఫ్ట్ ఇచ్చినట్లు తెలిపారు. జరిగిన విషయం అతడికి చెప్పాడు. విషయం తెలుసుకున్న అతడు సముద్రఖనికి ధైర్యం చెప్పి చనిపోవాలనే ఆలోచనను తప్పించాడట.

అతడిలో నింపిన ఆత్మవిశ్వాసంతోనే సముద్రఖని అవకాశాల కోసం ప్రత్నిస్తుండగా.. ఓ సినిమాలో అతడికి అసిస్టెంట్ డైరెక్టర్ గా అవకాశం వచ్చిందట. మొదట అతడు రూ.100 పారితోషకం తీసుకోగా.. అతడు ఆ డబ్బులతో మొదట చెప్పులను కొనుగోలు చేసినట్లు తెలిపారు. ఇప్పటికీ అతడికి వచ్చే డబ్బులతో చాలా వరకు చెప్పులు, షూలను ఎక్కువగా కొనుగోలు చేస్తారట. ఇలా ఆ ఘటన గురించి చెబుతూ ఎన్నో కష్టాలను అనుభవించినట్లు చెప్పాడు.