ఇండియా గురించి ఊహించినది వేరే.. చూసింది వేరే.. విదేశీ యువతి షాక్!

భారత్‌ పర్యటనకు వచ్చిన ఓ విదేశీ యువతి తన అనుభవాలను సోషల్ మీడియాలో పంచుకోవడంతో ఆ వీడియో ఇప్పుడు విపరీతంగా వైరల్ అవుతోంది. “ఇండియాలో నేను ఊహించని విషయాలు” అనే శీర్షికతో మియా అనే యువతి చేసిన ఈ పోస్ట్ నెటిజన్ల దృష్టిని ఆకర్షిస్తోంది. గోవాలో యోగా క్లాస్ ముగిసిన అనంతరం సముద్ర తీరంలో ఈ వీడియో చిత్రీకరించినట్లు ఆమె తెలిపింది. ఈ దేశం తనకు ఊహించినదానికంటే ఎంతో విభిన్నంగా అనిపించిందని, చివరకు భారతదేశం పట్ల ప్రత్యేకమైన అనుబంధం ఏర్పడిందని వెల్లడించింది.

మియా చెప్పిన విషయాల్లో ముఖ్యంగా భారతీయుల ప్రయాణ సంస్కృతి ఆమెను ఆశ్చర్యపరిచింది. దేశంలోని పలు ప్రాంతాల్లో తిరుగుతూ ఉండగా ఎక్కువగా భారతీయ పర్యాటకులే కనిపించారని, విదేశాల్లో చూసిన దానికి ఇది పూర్తిగా భిన్నమని పేర్కొంది. మొదట్లో హాస్టళ్లలో తాము మాత్రమే విదేశీయులుగా ఉండటం కొత్త అనుభవంగా అనిపించినా, త్వరలోనే స్థానికులతో స్నేహం పెరిగిందని తెలిపింది. వారితో కలిసి కొన్ని రోజులు ప్రయాణించడం తనకు ఎంతో గుర్తుండిపోయే అనుభవమని చెప్పింది.

భారతీయుల ఇంగ్లిష్ మాట్లాడే తీరు కూడా తనను ఆకట్టుకుందని మియా పేర్కొంది. చాలా మంది స్పష్టంగా, సులభంగా సంభాషించగలగడం వల్ల ఎక్కడా ఇబ్బంది కలగలేదని చెప్పింది. చిన్నప్పటి నుంచే ఇంగ్లిష్ నేర్పించడం, సోషల్ మీడియా ప్రభావం వంటివి దీనికి కారణమై ఉండవచ్చని ఆమె అభిప్రాయపడింది. దీనివల్ల స్థానికులతో త్వరగా కలిసిపోవడం సులభమైందని వివరించింది.

సదుపాయాల విషయానికి వస్తే, మారుమూల ప్రాంతాల్లో కూడా క్యాబ్ సేవలు అందుబాటులో ఉండటం తనకు ఆశ్చర్యంగా అనిపించిందని తెలిపింది. అలాగే ఆహార డెలివరీ సేవలు కూడా సులభంగా అందుబాటులో ఉండటం ప్రయాణాన్ని మరింత సౌకర్యవంతంగా మార్చిందని చెప్పింది. రెస్టారెంట్లలో పరిశుభ్రతకు ఇచ్చే ప్రాధాన్యం కూడా తనకు మంచి అనుభూతిని ఇచ్చిందని పేర్కొంది. దేశవ్యాప్తంగా వివిధ దేశాల వంటకాలు దొరకడం కూడా ప్రత్యేకంగా అనిపించిందని చెప్పింది.

అయితే, కొన్ని విషయాల్లో జాగ్రత్త అవసరమని కూడా ఆమె సూచించింది. ఆహార పదార్థాల నాణ్యత, తాగునీటి విషయంలో అప్రమత్తంగా ఉండాలని చెప్పింది. రైలు ప్రయాణం చేయాలనుకుంటే ముందుగానే టికెట్లు బుక్ చేసుకోవడం మంచిదని సూచించింది. చివరగా, “భారత్‌పై నాకు ముందే మంచి అభిప్రాయం ఉంది. కానీ ఇక్కడికి వచ్చాక అది మరింతగా పెరిగింది” అంటూ తన అనుభవాన్ని ముగించింది.