చికెన్ వంటలో చాలామంది చేసే కామన్ మిస్టేక్.. ఫుడ్ పాయిజనింగ్‌కు దారితీసే ప్రమాదం!

చికెన్ వండే ముందు నీళ్లతో బాగా కడగడం చాలా ఇళ్లలో సాధారణ అలవాటే. మార్కెట్‌ నుంచి తెచ్చిన మాంసాన్ని పలుమార్లు శుభ్రం చేస్తేనే అది సురక్షితం అవుతుందని చాలామంది భావిస్తుంటారు. అయితే ఆరోగ్య నిపుణులు మాత్రం ఈ అలవాటు వల్ల లాభం కంటే నష్టమే ఎక్కువగా ఉంటుందని హెచ్చరిస్తున్నారు. ముఖ్యంగా పచ్చి చికెన్‌ను పారే నీటిలో కడగడం వల్ల ప్రమాదకరమైన బ్యాక్టీరియా వంటగది అంతా వ్యాపించే అవకాశం ఉందని చెబుతున్నారు.

పచ్చి చికెన్‌లో సాధారణంగా సాల్మొనెల్లా, క్యాంపిలోబాక్టర్ వంటి బ్యాక్టీరియా ఉండే అవకాశం ఉంటుంది. చికెన్‌ను కడిగేటప్పుడు నీటి తుంపర్లు సింక్‌, కౌంటర్‌, పాత్రలు, పక్కనే ఉన్న కూరగాయలు లేదా ఇతర ఆహార పదార్థాలపై పడతాయి. దీంతో బ్యాక్టీరియా ఒక చోటు నుంచి మరోచోటుకు సులభంగా వ్యాపిస్తుంది. దీనినే నిపుణులు “క్రాస్ కంటామినేషన్”గా పేర్కొంటున్నారు.

ఆరోగ్య సంస్థల సూచనల ప్రకారం, చికెన్‌ను కడగడం వల్ల బ్యాక్టీరియా చనిపోదు. అవి పూర్తిగా నశించాలంటే సరైన ఉష్ణోగ్రతలో వండటం మాత్రమే మార్గమని చెబుతున్నారు. కనీసం 75 డిగ్రీల సెల్సియస్‌ వరకు చికెన్‌ను బాగా ఉడికిస్తే హానికరమైన సూక్ష్మక్రిములు నశించే అవకాశం ఉంటుంది. బయట కాలినట్టుగా కనిపించినా లోపల పూర్తిగా ఉడికిందో లేదో చూసుకోవడం అవసరమని నిపుణులు సూచిస్తున్నారు.

చిన్నపిల్లలు, వృద్ధులు, గర్భిణీలు వంటి వారికి ఫుడ్ ఇన్ఫెక్షన్లు త్వరగా సోకే ప్రమాదం ఉంటుంది. అందుకే వంటగదిలో శుభ్రత విషయంలో మరింత జాగ్రత్త అవసరమని వైద్యులు చెబుతున్నారు. చికెన్‌ను తాకిన తర్వాత చేతులను సబ్బుతో కనీసం 20 సెకన్ల పాటు శుభ్రం చేసుకోవాలి. అలాగే పచ్చి మాంసం కోసం వాడిన కత్తులు, కటింగ్ బోర్డులను ఇతర ఆహార పదార్థాలకు ఉపయోగించకపోవడం మంచిదని సూచిస్తున్నారు.

చికెన్‌ను ఫ్రిజ్‌లో కూడా ఇతర పదార్థాలకు దూరంగా, మూత ఉన్న డబ్బాల్లో నిల్వ చేయాలని నిపుణులు చెబుతున్నారు. వండే ముందు కడగడం కంటే, పరిశుభ్రంగా నిల్వ చేయడం మరియు పూర్తిగా ఉడికించడం ఆరోగ్యానికి మేలు చేస్తుందని స్పష్టం చేస్తున్నారు.