బీట్‌రూట్ జ్యూస్ వల్ల ఈ సమస్యలు రావొచ్చు.. ఎవరు జాగ్రత్తగా ఉండాలంటే!

ఆరోగ్యంపై అవగాహన పెరుగుతున్న కొద్దీ సహజ పానీయాల వినియోగం కూడా ఎక్కువవుతోంది. ముఖ్యంగా బీట్‌రూట్ జ్యూస్‌ను చాలా మంది రోజువారీ డైట్‌లో భాగంగా తీసుకుంటున్నారు. రక్తహీనత తగ్గించడం, శక్తిని పెంచడం, స్టామినా మెరుగుపరచడం వంటి ప్రయోజనాల కారణంగా ఇది హెల్త్ డ్రింక్‌గా మంచి గుర్తింపు తెచ్చుకుంది. అయితే ప్రతి ఒక్కరికీ బీట్‌రూట్ జ్యూస్ సరిపోదని వైద్య నిపుణులు హెచ్చరిస్తున్నారు.

బీట్‌రూట్‌లో ఉండే ఆక్సలేట్లు కొన్ని సందర్భాల్లో కిడ్నీ సమస్యలకు కారణమయ్యే అవకాశం ఉందని చెబుతున్నారు. ముఖ్యంగా కిడ్నీలో రాళ్ల సమస్యతో బాధపడేవారు లేదా అలాంటి సమస్యకు గురయ్యే అవకాశమున్న వారు బీట్‌రూట్ జ్యూస్‌ను అధికంగా తీసుకోకపోవడం మంచిదని సూచిస్తున్నారు. శరీరంలోని కాల్షియంతో కలిసే ఈ పదార్థాలు రాళ్ల ఏర్పాటుకు దారితీయవచ్చని ఆరోగ్య నిపుణులు వివరిస్తున్నారు.

రక్తపోటు తక్కువగా ఉండే వారు కూడా జాగ్రత్తగా ఉండాలని వైద్యులు చెబుతున్నారు. బీట్‌రూట్‌లోని సహజ నైట్రేట్లు రక్తనాళాలను విస్తరింపజేసి బీపీని తగ్గించే ప్రభావం చూపుతాయి. హై బీపీ ఉన్నవారికి ఇది కొంత ప్రయోజనకరంగా ఉన్నప్పటికీ, ఇప్పటికే లో బీపీతో బాధపడేవారిలో నీరసం, తల తిరగడం వంటి సమస్యలు పెరిగే అవకాశం ఉంటుంది.

జీర్ణవ్యవస్థ బలహీనంగా ఉన్నవారికి కూడా బీట్‌రూట్ జ్యూస్ కొన్ని ఇబ్బందులను కలిగించవచ్చు. పరగడుపున తాగితే కొందరికి గ్యాస్, కడుపు ఉబ్బరం లేదా విరేచనాలు వచ్చే అవకాశముందని నిపుణులు చెబుతున్నారు. అందుకే మొదట తక్కువ మోతాదులో తీసుకుని శరీరానికి సరిపోతుందో లేదో గమనించడం అవసరమని సూచిస్తున్నారు.

బీట్‌రూట్ తిన్న తర్వాత మూత్రం లేదా మలం ఎర్రటి రంగులో కనిపించడం చాలా మందిలో భయాందోళన కలిగిస్తుంది. అయితే ఇది సాధారణ మార్పే అని వైద్యులు చెబుతున్నారు. బీట్‌రూట్‌లోని సహజ రంగు పదార్థాల కారణంగా ఈ మార్పు వస్తుందని, సాధారణంగా దీనివల్ల ఎలాంటి ప్రమాదం ఉండదని స్పష్టం చేస్తున్నారు.

డయాబెటిస్ ఉన్నవారు, గర్భిణీలు, దీర్ఘకాలిక వ్యాధులకు మందులు వాడుతున్న వారు బీట్‌రూట్ జ్యూస్ తీసుకునే ముందు వైద్యుల సలహా తీసుకోవడం మంచిదని ఆరోగ్య నిపుణులు సూచిస్తున్నారు. నేరుగా ఎక్కువ మోతాదులో తీసుకోవడం కంటే క్యారెట్, అల్లం లేదా నిమ్మరసం కలిపి పరిమితంగా తీసుకుంటే మంచిదని చెబుతున్నారు.