మీ ముఖమే చెబుతోంది గుండె పరిస్థితి.. ఈ లక్షణాలను అస్సలు నిర్లక్ష్యం చేయొద్దు!

గుండె ఆరోగ్యం బాగోలేని సమయంలో శరీరం ముందుగానే కొన్ని హెచ్చరిక సంకేతాలను పంపిస్తుందని వైద్యులు చెబుతున్నారు. చాలామంది ఛాతి నొప్పినే గుండె సమస్యల ప్రధాన లక్షణంగా భావిస్తారు. కానీ ముఖంలో కనిపించే కొన్ని మార్పులు కూడా గుండె పనితీరు దెబ్బతింటోందనే సంకేతాలుగా ఉండొచ్చని నిపుణులు సూచిస్తున్నారు. అలాంటి లక్షణాలను ముందుగానే గుర్తిస్తే తీవ్రమైన ప్రమాదాలను నివారించే అవకాశం ఉంటుంది.

కళ్ల చుట్టూ లేదా కనురెప్పల దగ్గర చిన్న పసుపు రంగు గడ్డలు కనిపిస్తే వాటిని నిర్లక్ష్యం చేయొద్దని వైద్యులు హెచ్చరిస్తున్నారు. ఇవి శరీరంలో కొలెస్ట్రాల్ స్థాయులు అధికంగా ఉన్నాయని సూచించే అవకాశం ఉంది. రక్తంలో చెడు కొవ్వు పెరగడం వల్ల గుండెకు రక్తాన్ని సరఫరా చేసే నాళాల్లో బ్లాకేజీలు ఏర్పడే ప్రమాదం ఉంటుందని నిపుణులు చెబుతున్నారు.

అలాగే పెదవులు లేదా చర్మం నీలం రంగులోకి మారడం కూడా గమనించాల్సిన విషయం. రక్తంలో ఆక్సిజన్ సరైన స్థాయిలో అందకపోతే ఇలాంటి మార్పులు కనిపించవచ్చు. గుండె రక్తాన్ని సమర్థంగా పంపింగ్ చేయకపోతే ఈ లక్షణాలు బయటపడే అవకాశం ఉందని వైద్యులు చెబుతున్నారు.

ముఖం, కళ్ల చుట్టూ లేదా పెదవుల దగ్గర అకస్మాత్తుగా వాపు కనిపించినా జాగ్రత్త అవసరమని నిపుణులు సూచిస్తున్నారు. గుండె పనితీరు మందగించినప్పుడు శరీరంలో ద్రవాలు పేరుకుపోయి వాపులు వచ్చే అవకాశం ఉంటుంది. దీనిని సాధారణ అలసటగా భావించి వదిలేయకుండా వైద్యులను సంప్రదించడం మంచిదని చెబుతున్నారు.

కొన్ని సందర్భాల్లో దవడ, మెడ లేదా భుజాల దగ్గర నొప్పి కూడా గుండె సంబంధిత సమస్యలకు సంకేతం కావొచ్చు. ముఖ్యంగా మహిళల్లో ఈ లక్షణాలు ఎక్కువగా కనిపించే అవకాశం ఉందని ఆరోగ్య నిపుణులు వివరిస్తున్నారు. అలాగే కారణం లేకుండా చల్లని చెమటలు పట్టడం, ముఖం పాలిపోయినట్లు కనిపించడం కూడా గుండెపోటుకు ముందస్తు హెచ్చరికలుగా ఉండొచ్చని చెబుతున్నారు.

చెవి తమ్మెపై లోతైన ముడతలు కనిపించడం కూడా కొన్ని అధ్యయనాల్లో గుండె సమస్యలతో సంబంధం ఉన్న సంకేతంగా పేర్కొంటున్నారు. అయితే ఒక్క లక్షణం ఆధారంగా భయపడాల్సిన అవసరం లేదని, కానీ శరీరంలో కనిపించే మార్పులను నిర్లక్ష్యం చేయకుండా పరీక్షలు చేయించుకోవడం అవసరమని వైద్యులు సూచిస్తున్నారు.

ఆరోగ్యకరమైన ఆహారం, నిత్య వ్యాయామం, ఒత్తిడి నియంత్రణ, క్రమం తప్పకుండా ఆరోగ్య పరీక్షలు చేయించుకోవడం ద్వారా గుండె ఆరోగ్యాన్ని కాపాడుకోవచ్చని నిపుణులు చెబుతున్నారు.