కరోనా గురించి మరో షాకింగ్ న్యూస్.. వాటిపై సజీవంగా నాలుగు వారాలు!!

ప్రపంచ దేశాల్లో శరవేగంగా వ్యాప్తి చెందుతున్న కరోనా మహమ్మారి గురించి పరిశోధనలు చేసే కొద్దీ కొత్త విషయాలు వెలుగులోకి వస్తున్నాయి. తాజాగా కరోనా వైరస్ గురించి శాస్త్రవేత్తలు మరో షాకింగ్ విషయాన్ని వెల్లడించారు. ఫోన్ స్క్రీన్లు, స్టీల్ వ‌స్తువులపై కరోనా వైరస్ నాలుగు వారాల పాటు జీవిస్తుందని తెలిపారు. ప్రజలు ఇప్పటివరకు ఊహించిన దాని కంటే వైరస్ ఎక్కువ కాలం జీవిస్తూ ఉండటం గమనార్హం.

ఆస్ట్రేలియాకు చెందిన నేష‌న‌ల్ సైన్స్ ఏజెన్సీ శాస్త్రవేత్తలు పరిశోధనలు చేసి ఈ విషయాలను వెల్లడించారు. వస్తువులతో పాటు కరెన్సీ నోట్లపై సైతం కరోనా వైరస్ జీవించగలదని తేల్చారు. ల్యాబ్‌లో అనేక ప్రయోగాలు చేసి శాస్త్రవేత్తలు ఈ ఫలితాలను వెల్లడించారు. నిజానికి కరోనా వైరస్ నోటి ద్వారా వ్యాప్తి చెందుతుంది. నోటి ద్వారా బయటకు వచ్చిన వైరస్ గాలిలో తుంపరల వల్ల కూడా ప్రబలే అవకాశం ఉందని శాస్త్రవేత్తలు చెబుతున్నారు.

అమెరికాకు చెందిన సెంట‌ర్ ఫ‌ర్ డిసీజ్ కంట్రోల్ వస్తువుల ద్వారా కూడా వైరస్ వ్యాప్తి చెందే అవకాశం ఉందని తెలిపింది. గతంలో శాస్త్రవేత్తలు చేసిన పరిశోధనల్లో వారం కంటే తక్కువ రోజులఏ వైరస్ వస్తువులపై జీవిస్తుందని శాస్త్రవేత్తలు తేల్చారు. అయితే ఇప్పుడు అందుకు భిన్నంగా ఆస్ట్రేలియా శాస్త్రవేత్తలు చేసిన పరిశోధనలు ప్రజల్లో భయాందోళనను మరింత పెంచే విధంగా ఉండటం గమనార్హం.

వైరాల‌జీ జ‌ర్న‌ల్‌లో ఈ పరిశోధనకు సంబంధించిన ఫలితాలను ప్రచురించారు. వేడి వాతావ‌ర‌ణంలో కరోనా వైరస్ ఎక్కువ కాలం జీవించదని శాస్త్రవేత్తలు తేల్చారు. 40 డిగ్రీల సెంటిగ్రేడ్ మ‌ధ్య ఒక రోజు కాలంలో ఈ వైరస్ వ్యాప్తి జరగడం లేదని చెప్పారు. 20 డిగ్రీల సెంటిగ్రేడ్ వాతావరణంలో 28 రోజులు వైరస్ జీవిస్తుందని తెలిపారు.