Big Boss Season 6 : బిగ్ బాస్ హౌసులో బూతుల పర్వం… రెచ్చిపోయిన గలాటా గీతు..!

Big Boss Season 6 : అన్ని భాషలలోనూ విజయవంతం అయిన బిగ్ బాస్.. తెలుగులో ఇప్పటికే అయిదు సీజన్లు ఘనంగా పూర్తి చేసుకొని ఆరవ సీజన్లోకి అడుగుపెట్టింది. ఆరవ సీజన్ మొదలు అయ్యి రెండు వారాలు కూడా పూర్తి చేసుకుంది. 21 మంది కంటెస్టెంట్లతో మొదలు అయిన సీజన్6 మొదటివారం కాస్త చప్పగానే సాగింది. మొదటి వారం ఎలిమినేషన్స్ కూడా జరగలేదు. రెండవ వారం ఇద్దరు ఎలిమినేట్ అవ్వడం, నాగార్జున రిలాక్స్ అవ్వడానికి వచ్చి ఉంటే బయటకు వెళ్లొచ్చు అని హెచ్చరించడంతో ఆట తీరు కాస్త మారింది.

బూతులు మొదలు పెట్టిన గీతు రాయల్…

చిల్ అవ్వడానికి రాలేదు.. అని నాగార్జున అనడంతో అందరికీ గొడవ పడమని హింట్ ఇచ్చినట్టుగా అయింది. దాంతో ఇంతవరకు ఉన్న చిన్న చిన్న గొడవలు మూడోవారం ఎలిమినేషన్స్ లో పెద్ద గొడవలుగా మారాయి. ఈ వారం జరిగిన నామినేషన్ ప్రక్రియలో చలాకి చంటి పదిమందితో కలిసి ఉంటున్నప్పుడు సంస్కారంతో ఉండాలని చెప్తూ గీతు ని నామినేట్ చేసాడు. అందుకు గీతు ముందు మీకు సంస్కారం ఉందో లేదో చూసుకోండి అని గొడవ పెట్టుకుంది. అందరితో గొడవ పెట్టుకోవడం గేమ్ కాదని దీటుగా చంటి సమాధానం ఇవ్వగా.. నాకు తీట లేదు అందరితో గొడవ పెట్టుకోవడానికి అని గీతు అనింది.

తరువాత ఇనయా కూడా గీతు ఆట ఫెయిర్ గా లేదని నామినేట్ చేసింది. ఎందుకు నామినేట్ చేసిందో చెబుతూ.. ఎవరు ఏమి చెప్పిన వినకుండా విషయాన్ని సాగదీస్తుందని, తన బట్టలు పెట్టుకొనే రాక్ కూడా లాక్కుందని చెప్పింది. ఇనయా మాట్లాడే వరకు చాలా ఓపికగా ఉన్న గీతు తన అవకాశం రాగానే ఇనయా ను ‘ఇక్కడి నుండి దొబ్బెయ్ దొబ్బెయ్’ అంటూ వెటకారంగా మాట్లాడింది. బిగ్ బాస్ హౌస్ లో అందరూ మాట్లాడిన మాటలు కొన్ని కొన్ని ప్రాంతాల్లో అవి సాధారణ మాటలే అయినా షో లో ఇలాంటి మాటలు బాగోలేవని అభిప్రాయాలు వినిపిస్తున్నాయి.