బెల్లం తింటే లాభాలే కాదు.. ఈ సమస్యలు కూడా రావొచ్చు!

చక్కెరకు బదులుగా ఆరోగ్యకరమైన ప్రత్యామ్నాయంగా బెల్లాన్ని చాలామంది ఎంచుకుంటున్నారు. టీ, కాఫీ నుంచి స్వీట్స్ వరకు అనేక వంటకాలలో బెల్లం వినియోగం పెరిగింది. ఇందులో ఐరన్, మెగ్నీషియం, పొటాషియం వంటి ఖనిజాలు ఉండటంతో ఆరోగ్యానికి మంచిదనే అభిప్రాయం ప్రజల్లో బలంగా ఉంది. అయితే బెల్లం ఎంత ఆరోగ్యకరమైనదైనా.. ప్రతి ఒక్కరికీ అది సరిపోదని వైద్య నిపుణులు హెచ్చరిస్తున్నారు.

ముఖ్యంగా కొన్ని ఆరోగ్య సమస్యలతో బాధపడేవారు బెల్లాన్ని అధికంగా తీసుకుంటే లాభాల కంటే నష్టాలే ఎక్కువగా ఉండే అవకాశం ఉందని నిపుణులు చెబుతున్నారు. సరైన అవగాహన లేకుండా “నేచురల్ స్వీటెనర్” అని ఎక్కువగా తీసుకోవడం ఆరోగ్యంపై ప్రభావం చూపొచ్చని సూచిస్తున్నారు.

మధుమేహంతో బాధపడేవారు బెల్లం విషయంలో చాలా జాగ్రత్తగా ఉండాలి. చాలామంది చక్కెరకు బదులుగా బెల్లం తీసుకుంటే షుగర్ పెరగదని భావిస్తుంటారు. కానీ బెల్లంలో కూడా సహజ చక్కెరలు అధికంగా ఉంటాయి. ఇవి రక్తంలో గ్లూకోజ్ స్థాయిలను వేగంగా పెంచే అవకాశం ఉందని వైద్యులు చెబుతున్నారు. అందుకే డయాబెటిస్ ఉన్నవారు వైద్యుల సూచన మేరకే దీనిని తీసుకోవాలి.

బరువు తగ్గేందుకు డైట్ ఫాలో అవుతున్నవారు కూడా బెల్లాన్ని పరిమితంగా మాత్రమే తీసుకోవాలని సూచిస్తున్నారు. ఇందులో పోషకాలు ఉన్నప్పటికీ క్యాలరీలు కూడా ఎక్కువగానే ఉంటాయి. ఎక్కువ మోతాదులో తీసుకుంటే బరువు తగ్గడం బదులుగా పెరిగే ప్రమాదం ఉందని నిపుణులు చెబుతున్నారు.

జీర్ణక్రియ సమస్యలు ఉన్నవారు లేదా చిన్నపిల్లల్లో నులిపురుగుల సమస్య ఉన్నప్పుడు కూడా బెల్లం ఎక్కువగా ఇవ్వకూడదని వైద్యులు సూచిస్తున్నారు. కొన్ని సందర్భాల్లో ఇది కడుపులో అసౌకర్యం, ఇన్ఫెక్షన్లకు దారితీయొచ్చని హెచ్చరిస్తున్నారు. ముఖ్యంగా తాజాగా తయారైన బెల్లాన్ని అధికంగా తీసుకోవడం వల్ల సమస్యలు మరింత పెరిగే అవకాశం ఉంటుందని అంటున్నారు.

కిడ్నీ వ్యాధులతో బాధపడేవారికి కూడా బెల్లం పరిమితంగా ఉండాలని నిపుణులు చెబుతున్నారు. ఇందులో ఉండే పొటాషియం, సోడియం శరీరంలో అధికమైతే గుండె పనితీరుపై ప్రభావం చూపే అవకాశం ఉంటుంది. కాబట్టి కిడ్నీ సమస్యలు ఉన్నవారు స్వయంగా నిర్ణయం తీసుకోకుండా వైద్యులను సంప్రదించడం మంచిదని సూచిస్తున్నారు.

శరీరంలో వేడి ఎక్కువగా ఉండే వారు, ముఖ్యంగా వేసవికాలంలో బెల్లాన్ని ఎక్కువగా తీసుకోవడం వల్ల ఇబ్బందులు ఎదురయ్యే అవకాశం ఉందని చెబుతున్నారు. ముక్కు నుంచి రక్తస్రావం, చర్మంపై దద్దుర్లు, వేడి పెరగడం వంటి సమస్యలు తలెత్తవచ్చని వైద్యులు హెచ్చరిస్తున్నారు.

ఆరోగ్యానికి మంచిదని ఏ ఆహారాన్నైనా అధికంగా తీసుకోవడం సరికాదని నిపుణులు గుర్తుచేస్తున్నారు. బెల్లం కూడా మితంగా తీసుకుంటేనే ప్రయోజనం ఉంటుందని, ఇప్పటికే ఆరోగ్య సమస్యలు ఉన్నవారు వైద్యుల సలహా తీసుకోవడం ఉత్తమమని సూచిస్తున్నారు.