Geethanjali Movie : మాస్ హీరోని టాలీవుడ్ మన్మధుడిని చేసిన మణిరత్నం.. పెళ్లి చూడటానికి వచ్చిన అమ్మాయిని హీరోయిన్ చేసిన దర్శకుడు..!

Geethanjali Movie : అక్కినేని నాగేశ్వరరావు నట వారసుడిగా తెలుగు సినిమా రంగానికి పరిచయం అయ్యాడు నాగార్జున. 1986లో వచ్చిన ‘విక్రమ్’ సినిమా ద్వారా హీరోగా పరిచయం అయిన నాగార్జున సినీ ప్రయాణంలో చాలా సినిమాలు చేశాడు. అందులో ఎప్పటికీ నిలిచిపోయే సినిమాలలో ‘గీతాంజలి’ సినిమా ఒకటి. ఒక రొమాంటిక్ ప్రేమకథ తో వచ్చిన గీతాంజలి సినిమా నాగార్జున కెరీర్లో ఒక క్లాసిక్ గా నిలిచిపోయింది. ఈ సినిమా మంచి విజయం సాధించడంతో పాటు నటుడుగా నాగార్జునకు మంచి గుర్తింపు తెచ్చి పెట్టింది.

పెళ్లికి వచ్చిన అమ్మాయినే హీరోయిన్ గా…

1989 ముందు వరకు గీతాంజలి అనగానే రవీంద్రనాథ్ ఠాగూర్ గీతాంజలి అందరికీ గుర్తొచ్చేది. కానీ గీతాంజలి సినిమా వచ్చిన తరువాత తెలుగు సినిమా అభిమానులకు మాత్రం గీతాంజలి అనగానే టక్కున నాగార్జున సినిమానే మొదట గుర్తొస్తుంది. అంతలా అభిమానుల మనసు దోచుకుంది. అంతవరకూ మాస్ హీరోగా ఉన్న నాగార్జునను మణిరత్నం ఈ సినిమాతో టాలీవుడ్ మన్మధుడిగా చేసాడు. మొదట ‘అగ్ని నక్షత్రం’ అనే తమిళ్ సినిమాను రీమేక్ చేయాలని నిర్మాతలు భావిస్తే మణిరత్నం ఒక కొత్త కథను సినిమాగా తీయాలని ఒప్పించి మొదలుపెట్టారట. మణిరత్నం గీతాంజలి కథను నాగార్జునకు చెప్పగానే వెంటనే ఆయన కూడా ఒప్పేసుకున్నారట.

అయితే ఈ సినిమాకు హీరోయిన్ మాత్రం కొత్త అమ్మాయిని పెట్టాలని మణిరత్నం భావించారట. కానీ వెంటనే మణిరత్నం వివాహం సుహాసినితో జరగడం, ఆ పనుల్లో బిజీ గా ఉన్నారట. అయితే వీరి పెళ్ళికి క్రికెటర్ శ్రీకాంత్ కుటుంబ సమేతంగా హాజరు అవ్వడం వారితో పాటు శ్రీకాంత్ చెల్లెలు స్నేహితురాలు గిరిజ కూడా రావడం జరిగిందట. అపుడు ఆ అమ్మాయిని గమనించిన మణిరత్నం వివాహం తరువాత ఆ అమ్మాయి గురించి అడుగగా శ్రీకాంత్ తను, నా చెల్లి స్నేహితురాలు అమెరికా అమ్మాయి ఇక్కడికి అపుడప్పుడు వస్తుంది అని చెప్పడంతో తనను ఒప్పించి ఆ సినిమాలో హీరోయిన్ గా పెట్టారట. ఇలా పెళ్లి చూడటానికి వచ్చిన అమ్మాయిని సినిమాలో హీరోయిన్ గా పెట్టేసారు.