జెనీలియా సోషల్ మీడియాలో ఎమోషనల్ పోస్టు.. అందులో ఏముందంటే..?

టాలీవుడ్ లో హీరో సుమంత్ నటించిన సినిమా ‘సత్యం’. ఈ సినిమాను ప్రేక్షకులు ఎంతగానో ఆదరించారు. సినిమాతో తెలుగు తెరకు పరిచయమైంది అందాల తార జెనిలియా. తొలి సినిమాతోనే తనదైన అందం, నటనతో ఆకట్టుకున్న ఈ చిన్నది అనంతరం తెలుగులో పలు విజయవంతమైన చిత్రాల్లో నటించింది. ఇక సిద్ధార్థ్‌ హీరోగా వచ్చిన ‘బొమ్మరిల్లు’ చిత్రంలో హాసిని పాత్రతో ఒక్కసారిగా కుర్రకారు గుండెల్లో గుడి కట్టుకుందీ చిన్నది.

ఈ సినిమా ఆమె కెరీర్ లోనే ఓ మైలురాయిగా చెప్పుకోవచ్చు. తర్వాత ఆమె టాలీవుడ్ లో పలు చిత్రాల్లో నటించారు. పోతినేని రామ్ హీరోగా నటించిన సినిమా రెడీ. దీనిలో కూడా జెనీలియాకు మంచి మార్కులే పడ్డాయి. ఇలా ఆమె తన కెరీర్ లో స్టార్ హీరోయిన్ గా దూసుకుపోతున్న క్రమంలో బాలీవుడ్‌ యంగ్‌ హీరో రితేష్‌ దేశ్‌ముఖ్‌ను వివాహం చేసుకుంది.

వివాహం తర్వాత సినిమాలకు దూరంగా ఉంటూ వస్తోన్న జెనిలీయా వైవాహిక జీవితాన్ని ఎంతో సంతోషంగా గడుపుతోంది. ప్రేక్షకులకు ఆమె దూరం అయినప్పటికీ సోషల్ మీడియాలో కనెక్ట్ అవుతూనే వస్తున్నారు. సోషల్‌ మీడియా వేదికగా తన భర్త ఫొటోలను, తన పిల్లల ఫొటోలను షేర్ చేస్తూ ఉంటుంది. ఇక తాజాగా ఆమె షేర్ చేసిన ఓ పోస్ట్ తెగ వైరల్ గా మారింది. ఆమె పెద్ద కుమారుడు రియాన్‌ 7వ పుట్టినరోజు సందర్భంగా, జెనీలియా ఇన్‌స్టాగ్రామ్‌లో ఎమోషనల్‌ పోస్ట్‌ షేర్‌ చేసింది.

ప్రియమైన రియాన్‌! నీ చిట్టి బుర్రలో ఉన్న బోలెడన్ని కోరికలు, ఆశలను కచ్చితంగా నెరవేరుస్తానని ఈ సందర్భంగా నీకు మాటిస్తున్నా. నువ్వు ఎగరాలనుకున్నప్పుడు నేను నీ రెక్కను కాలేను కానీ, ఆ రెక్కల కింద గాలినవుతా. ప్రతీ విషయంలో నువ్వు మొదటి స్థానంలో ఉండాలని కోరుకోను.. చివరిగా ఉన్నా సరే.. నీ ప్రత్యేకతల్ని నేను గుర్తిస్తాను. అంతే కానీ నిరాశ చెందను ఎప్పుడూ నీవెంటే ఉంటా.. నువ్వు ఒంటరివి కాకుండా చూస్తాను.. హ్యపీ బర్త్ డే రియాన్.. ఐ లవ్ యూ మై బ్రేవ్ బాయ్.. అంటూ తల్లి ప్రేమను కురిపించింది. ఈ ఎమోషనల్ పోస్టు సోషల్ మీడియాలో చక్కెర్లు కొడుతోంది.